Шимолий Корея хакерлари ҳужумларда сунъий интеллектдан фойдаланмоқда

Жанубий Кореянинг “Genians” киберхавфсизлик компанияси душанба куни эълон қилган ҳисоботига кўра, Шимолий Корея разведка хизматларига алоқадор “Kimsuky” хакерлик гуруҳи 2026-йилдан буён мақсадли фишинг ҳужумларида сунъий интеллект ёрдамида яратилган ҳужжатлардан фойдаланиб келмоқда.

Ҳужумларда сунъий интеллектдан фойдаланилиб, тадқиқот ҳисоботлари ва таклифномалар каби қонуний ҳужжатларга ўхшатиб тайёрланган зарарли файлларни автоматик яратиш йўлга қўйилган.

Kimsuky гуруҳи аниқланишдан қочиш учун Ollama, GPT-4All ва Msty каби очиқ манбали воситалардан фойдаланиб, йирик тил моделларини интернетга уланмасдан ишга туширган.

"Сунъий интеллект қисқа вақтда кенг кўламли мавзулар бўйича юқори даражада сайқалланган ҳужжатларни яратиши мумкин, бу эса уни таҳдидчилар учун самарали воситага айлантиради," - деди Genians.

Бу ҳодисалар шуни кўрсатмоқдаки, энди алдамчи ҳужжатларни яратиш услуби ўзгарган. Энг эътиборлиси эса, сунъий интеллект ижтимоий муҳандислик ҳужумларини автоматлаштириш ва кенг миқёсда амалга оширишга кўмаклашиши намоён бўлмоқда.

Шимолий Кореянинг киберҳужумлари

Сўнгги йилларда содир этилган кўплаб киберҳужумларда Kimsuky ва Шимолий Корея ҳукумати билан алоқадор бошқа гуруҳлар айбланади.

Британиянинг блокчейн таҳлили билан шуғулланувчи Elliptic фирмаси ҳисоботига кўра, шимолий кореялик хакерлар 2025-йилнинг дастлабки тўққиз ойида 2 миллиард доллардан ортиқ криптовалюта ўмарган.

2014-йилда АҚШ расмийлари Sony Pictures ширкатига уюштирилган хакерлик ҳужумида Шимолий Кореяни айбдор деб топган эди. Бу ҳужум “Интервью” комедия фильмида Шимолий Корея етакчиси Ким Чен Иннинг масхара қилингани Пхеньян ғазабига сабаб бўлганидан кейин содир этилган.

Сунъий интеллект кибержиноятчиликни кучайтирмоқда

Киберхавфсизлик бўйича мазкур ҳисобот сунъий интеллектдан ёвуз ниятли шахсларнинг фойдаланиши ва унинг назоратдан чиқиб кетиши мумкинлиги ҳақидаги хавотирлар кучайган бир пайтда эълон қилинди.

Ўтган ҳафта АҚШлик тадқиқотчилар илк бор табиатда учрамайдиган вирусларни сунъий интеллект ёрдамида яратганини маълум қилди. Бу тиббиётда янги кашфиётларга умид уйғотган бўлса-да, юзага келиши мумкин бўлган хавфлардан хавотирни ҳам авжлантирди.

Кибержиноятчилик бўйича таҳлилчи Mark T. Hofmannнинг таъкидлашича, сунъий интеллект ёвуз ниятли шахслар учун янги имкониятлар тақдим этиб, кибержиноятчиликда мисли кўрилмаган ўзгаришлар ясамоқда.

“Энди сизга хакерлик маҳорати ёки ахборот технологиялари бўйича магистр даражаси керак эмас. Сизга фақат компьютер ва асос бўлса бас. Бутун дунёдаги кибержиноятчилар ҳужумларини тезлаштириш учун генератив сунъий интеллектдан, энг ёмони, сунъий интеллект агентларидан тобора кўпроқ фойдаланадилар”, – деди Hofmann “Ал-Жазира” нашрига.

“Сунъий интеллектнинг қоронғу томони – бу ўн йилликнинг асосий муаммоларидан биридир. Сунъий интеллект ёрдамидаги киберҳужумлар одатий ҳолга айланади”, – дея қўшимча қилди Hofmann.