Электромобиль зарядлаш харажатларининг бир қисми қоплаб берилиши мумкин

Бу ҳақда Энергетика вазирлиги томонидан жамоатчилик муҳокамасига қўйилган лойиҳада маълум қилинган.

Лойиҳага кўра, электромобилларни зарядлаш шохобчаларида сарфланган 1 кВт/соат электр энергияси нархининг 300 сўмдан юқори қисми давлат бюджети ҳисобидан қоплаб берилади.

Субсидия миқдори ва харажатлар

Ҳужжатда қайд этилишича, агар электр энергияси тарифи 1000 сўм/кВт·соат даражасида белгиланса, субсидия миқдори 700 сўмни ташкил этади.

Прогнозларга кўра:

• 2026 йилда тўлиқ йил ҳисобида харажатлар 246 млрд сўмни ташкил этади;
• 2030 йилга бориб бу кўрсаткич 819 млрд сўмга етиши мумкин.

2026 йилда механизм 1 майдан жорий этилиши сабабли, 8 ой учун тахминан 164 млрд сўм сарфланиши кутилмоқда.

Тўловлар қандай амалга оширилади?

Субсидиялар жисмоний шахслар даромадига киритилмайди. Тўловлар Солиқ қўмитаси томонидан ҳар ойда махсус мобил илова орқали фуқароларнинг банк карталарига ўтказиб берилади.

Лойиҳанинг мақсади

Ушбу ташаббус қуйидаги мақсадларга қаратилган:

• электромобиллардан фойдаланишни рағбатлантириш;
• транспорт соҳасида энергия самарадорлигини ошириш;
• углеводород ёқилғисига бўлган талабни камайтириш.

Маълум қилинишича, лойиҳа муҳокамаси 17 майга қадар давом этади.