Тошкентда реклама воситаларини демонтаж қилиш ва бизнесни электрдан узиш давом этмоқда

Бу ҳақда Бизнес омбудсман маълум қилди.

Қайд этилишича, мазкур ҳолатлар юзасидан тадбиркорлардан келиб тушган мурожаатлар назоратга олинган ва ҳозирда атрофлича ўрганилмоқда.

Шу муносабат билан Бизнес омбудсман масъул ташкилотлар ҳамда мансабдор шахсларни таъсир чораларини қўллашда амалдаги қонунчилик талабларига қатъий риоя этишга чақирди. Шунингдек, ҳар қандай чеклов ёки мажбурлов чоралари фақат қонуний асослар мавжуд бўлган тақдирдагина қўлланилиши лозимлиги таъкидланди.

Билдирилишича, ўрганишлар давомида мурожаатларда келтирилган ҳолатлар ўз тасдиғини топса, айбдор мансабдор шахсларга нисбатан қонунчиликда белгиланган тартибда тегишли чоралар кўрилади.

Эслатиб ўтамиз, мазкур масала аввалроқ Президент Шавкат Мирзиёев иштирокида ўтган йиғилишда ҳам муҳокама қилинган эди. Унда тадбиркорлик субъектининг номи ва фаолият турини кўрсатувчи пешлавҳаларни реклама сифатида баҳоламаслик, улар учун алоҳида паспорт расмийлаштириш талабини бекор қилиш ҳамда дизайн талабларини тадбиркорлар таклифларини инобатга олган ҳолда босқичма-босқич жорий этиш бўйича топшириқлар берилган эди. 

Аммо шунга қарамай, пойтахтда демонтаж ишлари ва айрим бизнес субъектларини электр таъминотидан узиш ҳолатлари юзасидан мурожаатлар келиб тушишда давом этмоқда.