Ўзбекистон ва Япония энергетика соҳасидаги ҳамкорликни янада ривожлантиради

10 сентябрь куни Ўзбекистон Республикаси энергетика вазири Шерзод Ходжаев Япония иқтисодиёт, савдо ва саноат давлат вазири Кенжи Ямада билан учрашди.
Бу ҳақда Ўзбекистон Энергетика вазирлиги матбуот хизмати хабар бермоқда.

Мулоқот давомида Ўзбекистон ва Япония ўртасидаги икки томонлама ҳамкорликни янада ривожлантириш масалалари муҳокама қилинди. Томонлар энергетика соҳаси икки давлат ўртасидаги стратегик шерикликнинг муҳим йўналишларидан бири эканини таъкидлаган.

Учрашувда Япониянинг етакчи энергетика компаниялари иштирокида Ўзбекистонда амалга оширилаётган йирик лойиҳаларнинг бориши ҳам кўриб чиқилган.
Томонлар электр энергияси ишлаб чиқариш қувватларини ривожлантириш, электр узатиш тармоқларини модернизация қилиш ва кенгайтириш, шунингдек, мамлакат газ транспорт инфратузилмасини янгилашга қаратилган лойиҳалар муҳокама қилишган.

Мазкур лойиҳалар Ўзбекистон энергетика инфратузилмасини модернизация қилиш, электр энергияси ишлаб чиқариш ва узатиш имкониятларини ошириш ҳамда мавжуд газ транспорт тизимини такомиллаштиришда муҳим аҳамият касб этади.

"Учрашув якунида томонлар ўзаро манфаатли лойиҳаларни илгари суриш, шунингдек, энергетика соҳасидаги яқин ва узоқ муддатли ҳамкорликни изчил давом эттиришга келишиб олди", — дейилади вазирлик хабарида.

Ҳасанбой ОЧУН