Тошкентдаги 35 та бозор ва савдо комплекси сотувга чиқарилади

Президентнинг «Тошкент шаҳрини 2026–2027 йилларда ижтимоий-иқтисодий ривожлантириш бўйича қўшимча чора-тадбирлар тўғрисида»ги қарорига мувофиқ, пойтахтдаги 35 та бозор ва савдо комплекси ҳамда уларнинг шохобчалари оммавий савдоларга чиқарилади.

Қарорда белгиланишича, сотувга чиқариладиган объектлар ўрнида замонавий экобозорлар, савдо ва хизмат кўрсатиш марказлари, кўнгилочар мажмуалар ҳамда кўп қаватли автотураргоҳлар ташкил этиш шарт қилиб белгиланган.

Оммавий савдоларга чиқариладиган йирик объектлар қаторига қуйидагилар киради:

• «Истеъмолда бўлган транспорт воситалари ва эҳтиёт қисмлари Сергели бозори» МЧЖ;
• «Чилонзор буюм савдо комплекси» АЖ;
• «Янгиобод ихтисослашган бозори» МЧЖ;
• «Фарҳод деҳқон бозори» АЖ;
• «Ўрикзор савдо комплекси» МЧЖ;
• «Қўйлиқ деҳқон бозори» АЖ;
• «Сергели деҳқон бозори» АЖ;
• «Наврўз», «Паркент», «Авиасозлар», «Қора-қамиш» ва бошқа бозорлар ҳамда уларнинг кўплаб шохобчалари.

Шунингдек, қарорга мувофиқ, Тошкент шаҳридаги бошқа деҳқон, ихтисослаштирилган ва буюм бозорларининг шохобчалари ҳамда бўш ер майдонлари ҳам тасдиқланадиган мастер-режалар ва белгиланган шартлар асосида электрон онлайн-аукцион орқали хусусий инвесторларга таклиф этилади.

Мазкур чоралар пойтахт савдо инфратузилмасини модернизация қилиш, инвестицияларни жалб этиш ва аҳоли учун замонавий хизмат кўрсатиш муҳитини яратишга қаратилган.