Тошкент кўчаларидан бирига Мустафо Камол Отатурк номи берилади

“Тошкент шаҳридаги кўчалардан бирига Мустафо Камол Отатурк номини бериш тўғрисида”ги Президент қарори 15 июнь қабул қилинди. 

Қарорга кўра, Тошкент шаҳри Яшнобод туманида барпо этилаётган “Ўзбек-турк дўстлиги” хиёбонига ёндош бўлган Абдулла Қодирий кўчасининг бир қисмига (Истиқбол, Фарғона йўли ва Нукус кўчалари кесишмасидан Абдулла Қодирий кўчаси ва Маҳтумқули шоҳкўчаси кесишмасигача) Мустафо Камол Отатурк номи берилади.

Мустафо Камол Отатурк ким?

Туркия Республикасининг биринчи президенти Мустафо Камол Отатурк 1881 йили Усмонлилар империясига қарам бўлган Грециянинг Салоники шаҳрида таваллуд топган.

Салоникида унинг сиёсий фаолияти бошланган. Дастлаб, Ёш туркларнинг “Иттиҳод ва тараққий” партиясига аъзо бўлган (1908), кейинчалик улардан аста-секин узоқлашган. Италия-Туркия уруши (1911-1912), 2-Болқон уруши (1913), Биринчи жаҳон урушида қатнашган.

У иродали сиёсатчи, моҳир қўмондон, кучли нотиқ эди. Отатурк ташаббуси билан Усмонли турк султонлиги тугатилиб, (1922 йил 1 ноябрь), Туркия республика деб эълон қилинди (1923 йил 29-октабр).

Давлат бошқаруви тубдан ўзгартирилиб, сиёсат, иқтисодиёт, маданият ва ҳарбий соҳада чуқур ислоҳотлар ўтказган. Мамлакат тараққиётининг устувор йўналишларини белгилаб берувчи 6 та тамойилни ишлаб чиққан.

Унинг таълимоти Туркияда отатуркчилик, Ғарбда эса камолизм деб аталади. Туркия Республикасида ислом динининг таъсири камайтириб, уни Ғарб намунасидаги дунёвий давлатга айлантириш жараёнини бошлаб берган Отатурк.