АҚШ президенти раислигида “Тинчлик кенгаши” ташкил этилди

АҚШ президенти Доналд Трамп расман Ғазо бўйича “Тинчлик кенгаши” низомини имзолади ва унинг раисига айланди. Бу ҳақда The Guardian нашри хабар берди.

Оқ уй матбуот котиби Кэролайн Левиттнинг маълум қилишича, низом расман кучга кирган ва “Тинчлик кенгаши” халқаро ташкилот сифатида фаолиятини бошлаган.

Низомни имзолаш маросимида 19 та давлат вакиллари иштирок этди. Улар орасида АҚШ, Озарбайжон, Арманистон, Қозоғистон, Ўзбекистон президентлари, шунингдек, Покистон, Индонезия ва Венгрия етакчилари бор. Шу билан бирга, кенгашга қўшилишга розилик билдирган айрим давлат раҳбарлари, жумладан, Беларусь раҳбари Александр Лукашенко маросимда қатнашмади.

Имзолаш маросимида сўзга чиққан Доналд Трамп бутун дунёда тинчликка эришиш мақсад қилинганини таъкидлади.

“Биз бутун дунёда тинчликка эришамиз ва бу барчамиз учун тарихга қўшилган улкан ҳисса бўлади. Бу залдаги ҳар бир инсон — юлдуз. Акс ҳолда, сиз бу ерда бўлмас эдингиз”, — деди АҚШ президенти.

Трамп “Тинчлик кенгаши” БМТ билан ҳамкорликда ишлашини маълум қилди. Шунингдек, у Украинадаги можарони ҳал этишда сезиларли силжиш борлигини, Ғазо секторидаги можаро якунига яқинлашаётганини, Эрон эса музокараларга тайёр эканини айтди. АҚШ ҳам бундай мулоқотга очиқ экани билдирилди.

Маълум қилинишича, кенгашга доимий аъзо бўлишни истаган давлатлар 1 миллиард доллар миқдорида бадал тўлаши лозим. АҚШ маъмурияти ушбу маблағлар Ғазо ҳудудини тиклашга йўналтирилишини ваъда қилмоқда.

Кенгаш низомига мувофиқ, аъзо давлатлар етакчилари йилда бир марта АҚШ президенти раислигида йиғилади. Кенгаш раиси — яъни АҚШ президенти — ташкилотни бошқаришда кенг ваколатларга эга. У ҳар қандай қарорга вето қўйиши, шунингдек, кенгашга ким аъзо бўлиши ёки аъзоликдан четлатилишини якка тартибда белгилаши мумкин.