AQSh prezidenti raisligida “Tinchlik kengashi” tashkil etildi

AQSh prezidenti Donald Tramp rasman Gʻazo boʻyicha “Tinchlik kengashi” nizomini imzoladi va uning raisiga aylandi. Bu haqda The Guardian nashri xabar berdi.

Oq uy matbuot kotibi Kerolayn Levittning maʼlum qilishicha, nizom rasman kuchga kirgan va “Tinchlik kengashi” xalqaro tashkilot sifatida faoliyatini boshlagan.

Nizomni imzolash marosimida 19 ta davlat vakillari ishtirok etdi. Ular orasida AQSh, Ozarbayjon, Armaniston, Qozogʻiston, Oʻzbekiston prezidentlari, shuningdek, Pokiston, Indoneziya va Vengriya yetakchilari bor. Shu bilan birga, kengashga qoʻshilishga rozilik bildirgan ayrim davlat rahbarlari, jumladan, Belarus rahbari Aleksandr Lukashenko marosimda qatnashmadi.

Imzolash marosimida soʻzga chiqqan Donald Tramp butun dunyoda tinchlikka erishish maqsad qilinganini taʼkidladi.

“Biz butun dunyoda tinchlikka erishamiz va bu barchamiz uchun tarixga qoʻshilgan ulkan hissa boʻladi. Bu zaldagi har bir inson — yulduz. Aks holda, siz bu yerda boʻlmas edingiz”, — dedi AQSh prezidenti.

Tramp “Tinchlik kengashi” BMT bilan hamkorlikda ishlashini maʼlum qildi. Shuningdek, u Ukrainadagi mojaroni hal etishda sezilarli siljish borligini, Gʻazo sektoridagi mojaro yakuniga yaqinlashayotganini, Eron esa muzokaralarga tayyor ekanini aytdi. AQSh ham bunday muloqotga ochiq ekani bildirildi.

Maʼlum qilinishicha, kengashga doimiy aʼzo boʻlishni istagan davlatlar 1 milliard dollar miqdorida badal toʻlashi lozim. AQSh maʼmuriyati ushbu mablagʻlar Gʻazo hududini tiklashga yoʻnaltirilishini vaʼda qilmoqda.

Kengash nizomiga muvofiq, aʼzo davlatlar yetakchilari yilda bir marta AQSh prezidenti raisligida yigʻiladi. Kengash raisi — yaʼni AQSh prezidenti — tashkilotni boshqarishda keng vakolatlarga ega. U har qanday qarorga veto qoʻyishi, shuningdek, kengashga kim aʼzo boʻlishi yoki aʼzolikdan chetlatilishini yakka tartibda belgilashi mumkin.