Шавкат Мирзиёев Дональд Трампга анъанавий ўзбек шийпонларини совға қилди

Шавкат Мирзиёев АҚШ президенти Дональд Трампга анъанавий ўзбек шийпонларини совға қилгани маълум бўлди. Бу ҳақда The New York Times эълон қилган мақолада сўз боради.

Миллий ҳунармандчилик намунаси бўлган иккита шийпон аллақачон Вашингтонга етказилган. Улар Ғарбий Потомак паркида президент Трамп режалаштирган Америка қаҳрамонлари миллий боғига ўрнатилмоқда.

Қайд этилишича, Трампга хорижий давлатлардан юборилган совғалар қаторида Қатардан ҳашаматли самолёт, Саудияда бир жуфт қоплон ва Ўзбекистон президенти томонидан туҳфа қилинган "нафис ишланган" шийпонлар бор.

Ўзбекистон шийпонлари – Трампнинг Америка қаҳрамонлари миллий боғи барпо этилиши режалаштирилган Ғарбий Потомак паркида намойиш этилади.

Ўзбекистоннинг АҚШдаги элчиси Фурқат Сиддиқов ўзининг X'даги (собиқ Twitter) саҳифасига ушбу ўзбек санъати асари Вашингтондаги Америка қаҳрамонлари боғининг бир қисмига айланаётганини қайд этди.

"Ўзбекистон президентининг АҚШ президенти ва Америка халқига совғаси бўлган иккита анъанавий ўзбек шийпони (айвони) ўзаро дўстлигимиз ва стратегик шериклигимиз рамзи бўлиб хизмат қилади", дейилади элчининг постида.