АҚШда Байден даврида қабул қилинган ўнлаб қонунлар бекор қилинди

Бу ҳақда Daily Caller нашри хабар бермоқда.

Маълум қилинишича, республикачилар Байден президентлигининг сўнгги ойларида қабул қилинган 22 та қарорни бекор қилган. Ушбу ҳужжатлар орасида:

• қазилма ёқилғи қазиб олишни чеклаш,
• бензинли двигателли автомобиллар савдосини босқичма-босқич қисқартириш,
• overdraft тўловларини чеклаш орқали фуқароларнинг кредитга киришини қийинлаштиришга қаратилган қонунлар мавжуд бўлган.

Натижада, АҚШда бир йил ичида бекор қилинган қонунлар сони 1996 йилдан буён энг юқори кўрсаткичга етгани таъкидланмоқда.

3 декабрь куни эса амалдаги президент Дональд Трамп Байден шахсан имзоламаган, балки автоматик қурилма — автопен орқали имзоланган барча ҳужжатларнинг амал қилишини бекор қилди. Оқ уй раҳбарияти бу қарор афв этиш ва жазоларни қисқартиришга оид ҳужжатларга ҳам тааллуқли эканини маълум қилди.

Аввалроқ Трамп Байден ўз президентлиги давомида қабул қилинган ҳужжатларнинг 92 фоизини автопен орқали имзолаганини маълум қилган эди. Шунингдек, сентябрь ойида Байденнинг Оқ уйдаги расмий портрети автограф ўрнига автопен тасвири билан алмаштирилгани ҳам кенг муҳокамаларга сабаб бўлган.

Трампнинг фикрича, Байден муайян даврларда тўлиқ муомалага лаёқатли бўлмаган ва унинг маъмурияти автопен орқали унинг номидан ҳужжатлар имзолаган. Шу муносабат билан у ёз ойларида автопендан фойдаланиш бўйича тергов ўтказишни ҳам буюрган. Бу ҳолатни Трамп 2020 йилги сайловлардан кейин АҚШ тарихидаги энг шов-шувли сиёсий можаролардан бири деб атаган.

Маълумот учун, аввалроқ Байден ҳам Трампни мамлакат нуфузига путур етказишда айблаган, шунингдек, Европа давлатлари раҳбарлари томонидан унга ҳозирги сиёсий жараёнларга қўшилиш бўйича мурожаатлар бўлганини айтган эди.