Трамп Украина учун сарфлаган пулларни қайтаришни талаб қилмоқда

Трамп бу ҳақда 3 сентябрь куни ўзининг Truth Social ижтимоий тармоғидаги саҳифасида ёзди. У Байден маъмурияти Украинага АҚШ томонидан катта миқдорда ўқ-дори ва бошқа ҳарбий ёрдам берилганини таъкидлади.

Трамп: “Биз бу пулни талаб қиламиз”

Трампнинг таъкидлашича, Байден маъмурияти Украина ва НАТОга «юзлаб миллиард доллар»лик ёрдамни бепул тақдим этган. Унинг фикрича, агар Европа давлатларидан аввалроқ тўлов талаб қилинганида, улар бу маблағни тўлаган бўлар эди.

Президент энди Вашингтон ушбу маблағларни Европа давлатларидан талаб қилишини, аммо бу талаб кечикиб билдирилаётганини айтди.

Трамп шунингдек, Байден маъмурияти Украинага Эрондаги АҚШ ҳарбий операцияси даврида ишлатилганидан ҳам кўпроқ ўқ-дори берганини даъво қилди.

Аввалроқ Трамп Украинага берилган ёрдам ҳажмини 300 миллиард доллар деб атаган эди. Бироқ Reuters таъкидлаганидек, бу рақам қаердан олингани аниқ эмас. Трампнинг 3 сентябрдаги баёнотида эса Европа учун талаб қилинаётган маблағнинг аниқ миқдори кўрсатилмаган.

АҚШ ўқ-дори захираларини тўлдирмоқда

Трамп АҚШда ўқ-дори ишлаб чиқариш ҳажми оширилаётганини ҳам маълум қилди. У Вашингтон ҳозирча ишлаб чиқарилаётган ўқ-дориларни аввало ўз захиралари учун сақлаб қолаётганини, иттифоқчиларга сотиш эса яқин орада қайта бошланишини айтди.

Трампнинг Европа давлатларидан Украинага аввал берилган АҚШ ёрдами учун тўлов талаб қилиш режаси ҳозирча умумий баёнот даражасида қолмоқда. Президент қайси давлатлардан қанча маблағ талаб қилиниши ва бунинг қандай механизм орқали амалга оширилишини аниқлаштирмаган.

Муаллиф: Ҳасанбой ОЧУН