“Эрон урушини давом эттиришдан маъно йўқ” – Хитой

Хитой президенти Си Сзинпин Пекин саммитининг сўнгги кунида АҚШ президенти Доналд Трампни қабул қилаётган бир пайтда, Хитой расмийлари жума куни Эрон урушини “давом эттиришдан маъно йўқ”лигини маълум қилди.

“Аслида бошланмаслиги керак бўлган бу можарони давом эттиришдан ҳеч қандай маъно йўқ”, – деди Хитой Ташқи ишлар вазирлиги вакили икки томоннинг Эрон масаласини муҳокама қилган-қилмагани ва Пекиннинг урушга доир позицияси ҳақидаги саволга жавобан.

“Мулоқот эшиги энди очилган экан, у қайта ёпилмаслиги керак”, — деди матбуот котиби ва вазият кескинлигини юмшатиш ҳамда сиёсий ечим топиш йўлидаги саъй-ҳаракатларни давом эттиришга чақирди. Шунингдек, у Эрон ядровий масаласи ва бошқа хавотирлар бўйича мулоқот олиб боришга ундади.

Матбуот котиби глобал таъминот занжирларининг барқарорлиги ва узлуксизлигини таъминлаш учун юк ташиш йўлларини имкон қадар тезроқ қайта очиш муҳимлигини алоҳида таъкидлади.

Трамп пайшанба куни “ FOX News” телеканалига берган интервьюсида Си “келишувга эришилишини истаётганини” айтди.

“Агар бирор ёрдамим тегса, ёрдам беришни истардим”, деди Си. Бунча кўп нефть сотиб оладиган ҳар қандай одамнинг, шубҳасиз, қандайдир алоқаси бўлади. У Ҳормуз бўғозининг очиқ бўлишини хоҳлайди”, — дея қўшимча қилди Трамп.

Трампнинг Хитойга ташрифи 28 февраль куни АҚШ ва Исроил кучларининг Эронга зарбалар бериши ортидан бошланган можаро фонида бўлиб ўтмоқда.

Трамп Эронга нисбатан сабри тугаётганини айтмоқда.

Оқ уйнинг маълум қилишича, Трамп ва Си Пекиндаги музокаралар чоғида Ҳормуз бўғозидаги кема қатнови йўлини очиқ сақлаш зарурлиги борасида келишиб олган.

Эрон 28 февралда бошланган АҚШ-Исроил ҳужумларига жавобан сув йўлини амалда ёпиб қўйган ва бу жаҳон энергия таъминотида мисли кўрилмаган узилишларга олиб келган.

Хитой Эронга яқин ва унинг нефтининг асосий харидоридир.