“Eron urushini davom ettirishdan ma’no yo‘q” – Xitoy

Xitoy prezidenti Si Szinpin Pekin sammitining so‘nggi kunida AQSH prezidenti Donald Trampni qabul qilayotgan bir paytda, Xitoy rasmiylari juma kuni Eron urushini “davom ettirishdan ma’no yo‘q”ligini ma’lum qildi.

“Aslida boshlanmasligi kerak bo‘lgan bu mojaroni davom ettirishdan hech qanday ma’no yo‘q”, – dedi Xitoy Tashqi ishlar vazirligi vakili ikki tomonning Eron masalasini muhokama qilgan-qilmagani va Pekinning urushga doir pozitsiyasi haqidagi savolga javoban.

“Muloqot eshigi endi ochilgan ekan, u qayta yopilmasligi kerak”, — dedi matbuot kotibi va vaziyat keskinligini yumshatish hamda siyosiy yechim topish yo‘lidagi sa’y-harakatlarni davom ettirishga chaqirdi. Shuningdek, u Eron yadroviy masalasi va boshqa xavotirlar bo‘yicha muloqot olib borishga undadi.

Matbuot kotibi global ta’minot zanjirlarining barqarorligi va uzluksizligini ta’minlash uchun yuk tashish yo‘llarini imkon qadar tezroq qayta ochish muhimligini alohida ta’kidladi.

Tramp payshanba kuni “FOX News” telekanaliga bergan intervyusida Si “kelishuvga erishilishini istayotganini” aytdi.

“Agar biror yordamim tegsa, yordam berishni istardim”, dedi Si. Buncha ko‘p neft sotib oladigan har qanday odamning, shubhasiz, qandaydir aloqasi bo‘ladi. U Hormuz bo‘g‘ozining ochiq bo‘lishini xohlaydi”, — deya qo‘shimcha qildi Tramp.

Trampning Xitoyga tashrifi 28-fevral kuni AQSH va Isroil kuchlarining Eronga zarbalar berishi ortidan boshlangan mojaro fonida bo‘lib o‘tmoqda.

Tramp Eronga nisbatan sabri tugayotganini aytmoqda.

Oq uyning ma’lum qilishicha, Tramp va Si Pekindagi muzokaralar chog‘ida Hormuz bo‘g‘ozidagi kema qatnovi yo‘lini ochiq saqlash zarurligi borasida kelishib olgan.

Eron 28-fevralda boshlangan AQSH-Isroil hujumlariga javoban suv yo‘lini amalda yopib qo‘ygan va bu jahon energiya ta’minotida misli ko‘rilmagan uzilishlarga olib kelgan.

Xitoy Eronga yaqin davlat va neftining asosiy xaridoridir.