Гаяна қирғоқларида паром ағдарилди: ҳалок бўлганлар сони ҳозирча 27 та

Гаяна қирғоқларида паром ағдарилиши оқибатида камида 27 киши ҳалок бўлди. Жанубий Американинг кичик давлати юз берган фожиа муносабати билан мотам тутмоқда. Бу ҳақда душанба куни мамлакат бош вазири Марк Филлипс маълум қилди.

Бош вазирнинг журналистларга билдиришича, 18 июль куни кечқурун ағдарилиб кетган MV Barima пароми бортидаги 69 киши қутқариб олинган. Яна 83 киши бедарак йўқолган деб ҳисобланмоқда.

Эскирган паром пойтахт Жоржтаундан Гаянанинг ички ҳудудидаги Эссекибо минтақасига йўл олган пайтда ағдарилиб кетган.

Филлипснинг сўзларига кўра, фалокатдаги одамлар сони борасидаги ноаниқликлардан сўнг, у энди бортда 179 киши бўлганига “ишончи комил”.

Душанба куни қидирув ҳудуди 400 квадрат километрдан 1 070 квадрат километргача кенгайтирилди. Қутқарув ишларига маҳаллий балиқчилар ҳам жалб этилган.

Президент маъмурияти маълум қилишича, қўшни Франция Гвианасидан Франция армияси қидирув-қутқарув амалиётига кўмаклашиш учун 12 нафар ғаввос, икки нафар шифокор ва бир нафар механик юборган.

Филлипс якшанба куни журналистларга ҳодисадан сўнг эскирган паром экипажининг икки аъзоси марихуана истеъмол қилгани аниқланганини, айни пайтда ушбу ҳолат юзасидан тергов олиб борилаётганини маълум қилган эди.

Эдгиллнинг сўзларига кўра, кема сафарга куннинг иккинчи ярмида йўлга чиққан, фавқулодда ёрдам сигнали эса тахминан саккиз соатдан кейин қабул қилинган.

VesselFinder кемалар базаси маълумотларига кўра, ушбу паром 1939 йилда қурилган.