Венесуэлада ҳалокатли зилзила бўлди. Қурбонлар 100 мингтага етиши мумкин

24 июнь куни маҳаллий вақт билан 18:04 атрофида Венесуэла пойтахтининг ғарбида кучли зилзилалар содир бўлди. Оқибатда Каракасдаги бинолар қулаб, одамлар вайроналар остида қолди. 

Олимлар Жанубий Америка мамлакати бўйлаб кўплаб қурбонлар бўлиши ва кенг кўламли вайронагарчиликлар юз бериши мумкинлиги ҳақида огоҳлантирмоқда.

Талафот кўлами

АҚШ Геология хизмати маълумотларига кўра, Каракасдан тахминан 160 км ғарбда 7,2 магнитудали зилзила содир бўлиб, орадан бир дақиқа ўтмай, 7,5 магнитудали иккинчи тебраниш кузатилган.

“Қурбонлар сони кўпайиб, жиддий талафотлар юз бериши эҳтимоли юқори. Офат кўламининг қамрови эса кенгайиши мумкин”, — дея хабар берди Геология хизмати. 

Ташкилотнинг дастлабки тахминларига кўра, ҳалок бўлганлар сони 10 000 дан 100 000 гачани ташкил этиши мумкин.

Муваққат президент Делси Родригес фавқулодда ҳолат эълон қилишини ҳамда тиклаш ишларини қўллаб-қувватлаш учун кўп томонлама ташкилотлардан маблағ сўрашини маълум қилди.

Маҳаллий расмийлар ва гувоҳлар бинолар қулагани, қутқарув ишлари олиб борилаётгани ва жароҳатланганлар сони ортаётгани ҳақида хабар берди.

Каракасдаги Чакао муниципалитети мери Густаво Дукенинг хабар беришича, бир нечта бино қулаб тушган ва биргина бинонинг ўзидан 18 нафар тирик қолган киши қутқариб олинган. У одамларни жамоат майдонларидан бошпана излашга ундаб, зилзила тебранишлари яна такрорланиши мумкинлигидан огоҳлантирди.

Қутқарув ва чекловлар

Соҳилбўйи Фалкон штатида йигирма икки киши жароҳатланди, деб хабар берди губернатор Виктор Кларк давлат телеканали орқали. Бедарак йўқолган ўн беш киши ҳамон қидирилмоқда.

Касалхоналар янги жароҳатланганларни қабул қилишга ҳозирланяпти.

Каракасдаги “Hospital de Clinicas” шифохонаси ходимларидан жароҳатланганларга ёрдам бериш учун тунги сменада икки баравар кўпроқ ишлаш сўралган.

Родригеснинг айтишича, Каракасдан шимолда, қирғоқда жойлашган Венесуэланинг энг йирик аэропорти — Майкетиа етказилган зарар туфайли ёпилган.

Шунингдек, ҳафта охиригача дарслар бекор қилинди.

Сейсмик хавфли зона

Венесуэла Кариб ва Жанубий Америка плиталари туташган сейсмик фаол ҳудудда жойлашган.

АҚШ Геология хизмати маълумотларига кўра, 1812 йилда юз берган кучли зилзила Мерида ва Каракас шаҳарларида катта вайронагарчиликларга сабаб бўлган ва ўшанда қурбонлар сони тахминан 30 000 кишини ташкил этган.