Ҳиндистонда мусулмонлар асос солган университет бузилиши мумкин

Ҳиндистоннинг Уттар-Прадеш штатида жойлашган Муҳаммад Али Жавҳар университетини бузиш режаси мамлакатда кенг муҳокамаларга сабаб бўлди. Вилоят маъмурияти университетнинг 40 та биносидан 38 таси тегишли рухсатномаларсиз қурилганини маълум қилди.

Университет раҳбарияти ва талабалар бу қарорга қарши чиқиб, уни бекор қилишни талаб қилмоқда. Рампур шаҳрида юзлаб талабалар, битирувчилар ва маҳаллий аҳоли иштирокида муддатсиз норозилик намойиши бошланган.

Университет 2006 йилда таниқли мусулмон сиёсатчиси Азам Хон томонидан ташкил этилган. У Ҳиндистон шимолидаги йирик мусулмон олий таълим муассасаларидан бири ҳисобланади.

Университет проректори Заҳируддиннинг айтишича, бинолар қурилган вақтда мазкур ҳудуд Рампур ривожлантириш бошқармаси ваколатига кирмаган ва шунинг учун қўшимча рухсат талаб этилмаган. Унинг таъкидлашича, қарор таълим олиш ҳуқуқига зид ҳисобланади.

Маҳаллий ҳокимият эса қонунбузарликларни амалдаги қонунчилик асосида бартараф этишнинг ягона йўли биноларни бузиш эканини билдирмоқда.

Талабаларнинг айтишича, университет ёпилса, айниқса қизлар учун таълимни давом эттириш имконияти кескин чекланади. Норозилик акцияларига мусулмонлар билан бирга университетда таҳсил олаётган ҳинду талабалар ҳам қўшилган.