Испания ҳукумати Исроил компаниялари билан қарийб 1 млрд евролик икки шартномани бекор қилди

Испания ахборот агентлиги EFE хабарига кўра, ҳукумат 9 сентябрда эълон қилинган тўққиз санкция чорасидан бири – Исроилга қурол етказиб бериш эмбаргосини расмийлаштирувчи қироллик фармонини ҳали тасдиқламаган бўлса-да, амалда уни қўллашни бошлаб юборган.

Ҳукумат манбалари маълум қилишича, қироллик фармони келаси ҳафта қабул қилиниши кутилмоқда, аммо аниқ амалий қадамлар аллақачон ташланган.

Мудофаа вазирлиги қўшин эҳтиёжлари учун мўлжалланган икки шартномани расман бекор қилган:

қиймати 700 млн евро бўлган юқори мобил реактив залпли ўт очиш тизимлари – Silam’ни харид қилиш шартномаси (Rheinmetall Expal Munitions ва EM&E қўшма корхонаси билан); 

қиймати 287,5 млн евро бўлган 168 та Spike L.R. танкка қарши ракеталарини етказиб бериш шартномаси (Исроилнинг Rafael концернининг Испаниядаги дочер компанияси PAP Tecnos Innovacion SA билан).

Маълум қилинишича, Мудофаа вазирлиги Исроил билан ҳарбий-технологик алоқаларни узиш ва испан қуролли кучларини зарур дастурий таъминот ҳамда қурол-аслаҳа билан таъминлайдиган муқобилларни топиш бўйича ишларни давом эттирмоқда.

Шу билан бирга, қироллик фармонининг кечикиши унинг матнини тайёрлаш мураккаблиги ва уни Европа қонунчилигига мувофиқлаштириш зарурати билан изоҳланмоқда.