Беш йил аввалги башорат: Аргентина Испанияни 3:2 ҳисобида ютади

Унда номаълум фойдаланувчи худди шу учрашувни ва ҳатто ҳисобини олдиндан "башорат" қилган эди.
  Беш йил муқаддам эълон қилинган ушбу постда муаллиф "Аргентина Жаҳон чемпионати–2026 финалида Испанияни 3:2 ҳисобида мағлуб этади" деб ёзган эди. Ўшанда бу оддий тахмин сифатида қабул қилинган ва унча эътибор тортмаган.
 

  Аммо вазият энди ўзгарди. Аргентина Англияни ярим финалда 2:1 ҳисобида, Испания эса Францияни 2:0 ҳисобида мағлуб этиб, финалга йўлланма олгач, эски пост қайта топилиб, ижтимоий тармоқларда яшин тезлигида тарқала бошлади. Фойдаланувчилар муаллифнинг "кўрувчанлиги"дан ҳайратда — зеро, финалда худди шу икки терма жамоа — Лионел Месси бошчилигидаги Аргентина ва Ламин Ямал раҳбарлигидаги Испания рўпара келади.

  Таъкидлаш жоизки, бу икки терма жамоа тарихда Жаҳон чемпионати финалида ҳали бирор марта учрашмаган. Аргентина ва Испания ўртасидаги бош ҳал қилувчи учрашув 19 июль куни Нью-Йорк/Нью-Жерси стадионида бўлиб ўтади. Аргентина мудофаадаги чемпион унвонини ҳимоя қилса, Испания эса 2010 йилдан бери биринчи бор кубокни қўлга киритишга интилмоқда.
Постнинг ҳақиқий башорат бўлиш-бўлмаслигини вақт кўрсатади — буни фақат 19 июль куни ўйин якунида билиб оламиз.
 

Мафтуна Бахтиёрова