Аргентина терма жамоасини келажакда ким бошқариши ноаниқ

Жаҳон чемпионати финалида 10 киши бўлиб қолган Аргентина Испанияга 0:1 ҳисобида мағлуб бўлди.

Аргентина терма жамоаси бош мураббийи Лионель Скалони ўйиндан сўнг берган интервьюсида келажакдаги мураббийлик фаолияти борасида ҳали бир қарорга келмаганини айтди.

48 ёшли мутахассис 2018 йилги Жаҳон чемпионатида Аргентина 1/8 финалда мусобақани тарк этганидан сўнг бош мураббий этиб тайинланганди. Ўша пайтда унинг мустақил мураббий сифатидаги тажрибаси деярли йўқлиги сабаб бу қарордан кўпчилик норози бўлганди.

Декабр ойида Скалонининг шартномаси якунланади. Агар у узайтирилмаса, Скало Аргентина терма жамоаси тарихида энг муваффақиятли мураббий сифатида муҳрланади.

Унинг мураббийлигида Аргентина:

• 2022 йилги Жаҳон чемпионати ғолиби бўлди;
• 2021 ва 2024 йилларда Америка кубогини қўлга киритди;
• 2026 йилги мундиалда жамоа финалга чиқди.

“Шартномам якунлангунига қадар ишлайман, кейин бироз ўйлаб олишим керак. Чунки бундан ҳам каттароқ натижага эришиш мумкинми ёки йўқми, билмайман”, — деди Скалони.

Агар Скалони фаолиятини давом эттирса, энди анча ўзгарган таркиб билан ишлашига тўғри келади.

39 ёшли Лионель Месси турнир давомида 8 та гол ва 4 та голли узатма билан яна бир бор юқори маҳоратини намойиш этди. Бироқ саккиз карра “Олтин тўп” соҳибининг 2030 йилги Жаҳон чемпионатида иштирок этиши амримаҳол.

2022 ва 2026 йилги Жаҳон чемпионати финалларида Аргентинанинг асосий таркибида саккиз нафар футболчи майдонга тушди. Яқин йилларда эса жамоада сезиларли авлод алмашинуви бўлиши муқаррар.

Скалони финал натижасига эътирози йўқлигини ҳам таъкидлади. Учрашув давомида Испания тўп назорати ва зарбалар сони бўйича устунлик қилди ҳамда Ферран Торреснинг қўшимча бўлимнинг 106 дақиқасидаги голи эвазига 1:0 ҳисобида ғалаба қозонди.

“Бизни қўллаб-қувватлаган барча мухлисларга миннатдорчилик билдираман. Улар бизга энг керакли нарсани – куч-ғайратни беришди. Охиригача курашдик, аммо бу сафар насиб қилмади. Тан олишимиз керак, Испания ғалабага лойиқ эди. Аммо, биз ҳам жуда яқин тургандик. Футболчиларим ва Жаҳон чемпионати финалига чиқишимиз учун меҳнат қилган барчага раҳмат!” – деди мураббий.