Исроиллик эркак Қуддусда христиан роҳибасига ҳужум қилиб, жароҳат етказди
Исроиллик аскарнинг Исо Масиҳ рамзи бўлган ҳайкални синдириб кетгани билан боғлиқ мунозаралар тинчиб улгурмаган бир пайтда, Исроил насронийларга қарши яна бир нафрат жинояти билан кун тартибига чиқди.
Қуддусдаги Франция Инжил ва археология тадқиқот мактабининг 48 ёшли тадқиқотчиси бўлган аёлга сешанба куни Сион тоғидаги насронийлар ва яҳудийлар учун муқаддас саналган Сенакл биноси олдида ҳужум уюштирилди. Роҳиба ҳужум оқибатида бошидан жароҳатланган.
Роҳиба фаолият юритадиган тадқиқот маркази билан алоқадор бўлган Қуддус яҳудий университети бу ҳужум “алоҳида бир ҳодиса эмас, балки насроний жамияти ва унинг рамзларига нисбатан кучайиб бораётган душманликнинг хавотирли бир кўриниши” эканлигини маълум қилди.
Ишғол остидаги Шарқий Қуддусда ҳужум қилган 36 ёшли эркак Исроил полицияси томонидан қўлга олинган.
Ушбу воқеа мамлакатдаги диний озчиликларга нисбатан зўравонлик билан боғлиқ хавотирларни қайта кун тартибига олиб чиқди.
“Қуддус кўчасида осойишта кетаётган роҳибани яҳудий эмаслиги учун туртишади, итариб юборишади ва ерга йиқитишади, сўнгра ўша тажовузкор уни тепкилайди. Агар бу яҳудий терроризми бўлмаса, унда нима?...” – дея X платформасида пост қолдирди исроиллик таниқли дипломат Даниэл Кармон
Ташқи ишлар вазирлиги баёнотида роҳибага қилинган ҳужум жуда жиддий қабул қилингани ва воқеа юзасидан бошланган терговдан сўнг гумонланувчининг ҳибсда сақланаётгани эслатиб ўтилди.
"Ушбу тубан ҳужумни қатъиян қоралаймиз", дейилган баёнотда, шунингдек, ҳужумнинг биргаликда яшаш ва дин эркинлиги қадриятларига зид экани таъкидланган.
