Isroillik erkak Quddusda xristian rohibasiga hujum qilib, jarohat yetkazdi
19-aprel kuni isroillik askarning Iso Masih ramzi bo‘lgan haykalni sindirib ketgani bilan bog‘liq munozaralar tinchib ulgurmagan bir paytda, Isroil nasroniylarga qarshi yana bir nafrat jinoyati bilan kun tartibiga chiqdi.
Quddusdagi Fransiya Injil va arxeologiya tadqiqot maktabining 48 yoshli tadqiqotchisi bo‘lgan ayolga seshanba kuni Sion tog‘idagi nasroniylar va yahudiylar uchun muqaddas sanalgan Senakl binosi oldida hujum uyushtirildi. Rohiba hujum oqibatida boshidan jarohatlangan.
Rohiba faoliyat yuritadigan tadqiqot markazi bilan aloqador bo‘lgan Quddus yahudiy universiteti bu hujum “alohida bir hodisa emas, balki nasroniy jamiyati va uning ramzlariga nisbatan kuchayib borayotgan dushmanlikning xavotirli bir ko‘rinishi” ekanligini ma’lum qildi.
Ishg‘ol ostidagi Sharqiy Quddusda hujum qilgan 36 yoshli erkak Isroil politsiyasi tomonidan qo‘lga olingan.
Ushbu voqea mamlakatdagi diniy ozchiliklarga nisbatan zo‘ravonlik bilan bog‘liq xavotirlarni qayta kun tartibiga olib chiqdi.
“Quddus ko‘chasida osoyishta ketayotgan rohibani yahudiy emasligi uchun turtishadi, itarib yuborishadi va yerga yiqitishadi, so‘ngra o‘sha tajovuzkor uni tepkilaydi. Agar bu yahudiy terrorizmi bo‘lmasa, unda nima?...” – deya X platformasida post qoldirdi isroillik taniqli diplomat Daniel Karmon
Tashqi ishlar vazirligi bayonotida rohibaga qilingan hujum juda jiddiy qabul qilingani va voqea yuzasidan boshlangan tergovdan so‘ng gumonlanuvchining hibsda saqlanayotgani eslatib o‘tildi.
"Ushbu tuban hujumni qat’iyan qoralaymiz", deyilgan bayonotda, shuningdek, hujumning birgalikda yashash va din erkinligi qadriyatlariga zid ekani ta’kidlangan.
