Нью-Йоркнинг янги мери ишни Исроилга оид фармойишларни бекор қилишдан бошлади

Бекор қилинган қарорлар орасида Исроилни қўллаб-қувватлашга қаратилган ҳужжатлар ҳам мавжуд.

Янги фармонга кўра, 2024 йил 26 сентябрдан 2025 йил 31 декабргача имзоланган ва амалда бўлган барча ижро фармойишлари ўз кучини йўқотади. Илгариги қарорлар, агар улар алоҳида тартибда ўзгартирилмаган ёки бекор қилинмаган бўлса, амалда қолади. Ҳозирда амал қилаётган фавқулодда фармойишлар ушбу қарорга тааллуқли эмас.

Бекор қилинган ҳужжатлар қаторида ўтган ойда қабул қилинган, шаҳар идораларига Исроилни бойкот қилиш ёки ундан активларни чиқариб олишни тақиқловчи фармон ҳам бор. Шунингдек, июнь ойида қабул қилинган ва антисемитизмга кенг таъриф бериб, Исроилни танқид қилишнинг айрим шаклларини антисемитизм сифатида баҳолаган кўрсатма ҳам бекор қилинди. Бироқ Мамдани олдинги маъмурият томонидан ташкил этилган антисемитизмга қарши кураш идорасини сақлаб қолди.

The New York Times нашрининг ёзишича, Нью-Йорк фуқаролик эркинликлари иттифоқи директори Донна Либерман мазкур фармойишлар аввалги мер қўшилмаган нуқтаи назарларни чеклашга қаратилган сўнгги чоралар бўлиб туюлганини билдирган. У янги маъмуриятнинг уларни бекор қилиш қарори кутилмаган ҳолат эмаслигини ҳам таъкидлаган.

1 январь куни Нью-Йорк тарихида илк бор сайланган мусулмон мер Зоҳран Мамдани лавозимга киришиш олдидан Қуръонга қасамёд қилган. У Демократик партиядан номзод сифатида қатнашиб, ноябрь ойида бўлиб ўтган сайловда ишончли ғалабага эришган.

Сайлов олдидан АҚШнинг собиқ президенти Доналд Трамп Мамданининг сайланишига қарши чиқиб, демократлардан бўлган бошқа номзод — ёзда Мамданига праймеризда мағлуб бўлган Эндрю Куомога овоз беришга чақирган эди.