Исроил армияси Ғазо шаҳридаги Рантиси болалар шифохонасига зарба берди

Вазирлик маълумотига кўра, кеча кечқурун исроиллик ҳарбийлар бир неча дақиқа ичида уч маротаба шифохонанинг юқори қаватларини ўққа тутган.

«Бу жиноят яна бир бор Исроилнинг Ғазодаги соғлиқни сақлаш тизимини қасддан йўқ қилишга қаратилган сиёсатини исботлайди», — дейилади баёнотда.

Рантиси болалар шифохонаси Ғазо секторида ягона ихтисослаштирилган тиббий муассаса ҳисобланади. У ерда онкологик касаллар даволанади, диализ жараёнлари ўтказилади, нафас олиш ва ҳазм тизими касалликлари билан оғриган беморларга ёрдам кўрсатилади.

Ҳужум вақтида шифохонада 80 бемор даволанаётган бўлиб, улар орасида реанимация бўлимидаги 4 нафар бола ва янги туғилган чақалоқлар бўлимидаги 8 нафар чақалоқ ҳам бор эди.

Зарба ортидан 40 нафар бемор фарзандларини асраб қолиш ва хавфсиз жой излаш мақсадида шифохонани тарк этган. Қолган 40 нафар бемор ва уларга ҳамроҳ шахслар, жумладан 12 нафар оғир аҳволдаги реанимация бемори ҳамда 30 нафар тиббиёт ходими бинода қолган.

Соғлиқни сақлаш вазирлиги ҳужумни кескин қоралаб, Ғазодаги барча тиббиёт муассасалари, уларнинг ходимлари ва беморларни ҳимоя қилишга чақирди.

Исроил армияси эса ҳали ҳам Ғазо секторидаги турли ҳудудларга массирован ҳужумлар уюштириб, аҳоли уйларини бомбардимон қилмоқда. Бунинг орқали улар тинч аҳолини ўз уйларини тарк этишга мажбур қилишга интилаяпти.