Трамп: “Исроилнинг Қатарга ҳужум қилиш қарори тўлиқ Нетаньяҳуга тегишли”

Трамп Truth Social платформасида: “суверен давлат ва АҚШнинг яқин иттифоқчиси бўлган Қатарни бомбардимон қилиш на Исроилга, на Американинг мақсадларига хизмат қилади” деб ёзди.

Президентнинг сўзларига кўра, улар ҳужум ҳақида фақатгина унинг амалга ошиши олдидан АҚШ армияси орқали маълумот олган. “Биз бу ҳақда хабардор бўлган пайтимизда кеч бўлган эди”, — деди у. Шу заҳоти у ўзининг махсус вакили Стив Уиткоффга Қатар томонини яқинлашаётган ҳужумдан хабардор қилишни топширган, бироқ бу ҳужумни тўхтатиш имконияти бўлмаган.

Трамп Қатарни АҚШнинг кучли иттифоқчиси ва дўсти сифатида эътироф этар экан, ҳужумдан кейин Исроил бош вазири Нетаньяҳу ҳамда Қатар амири ва бош вазири билан мулоқот ўтказганини қайд этди. Унинг таъкидлашича, Вашингтон Қатар ҳудудида бундай воқеа қайта содир бўлмаслигига кафолат беради.

Шунингдек, Трамп давлат котиби Марко Рубиога Қатар билан мудофаа соҳасида ҳамкорлик тўғрисидаги келишувни якунлаш вазифасини топширганини билдирди.