Nyu-Yorkning yangi meri ishni Isroilga oid farmoyishlarni bekor qilishdan boshladi

Bekor qilingan qarorlar orasida Isroilni qoʻllab-quvvatlashga qaratilgan hujjatlar ham mavjud.

Yangi farmonga koʻra, 2024 yil 26 sentabrdan 2025 yil 31 dekabrgacha imzolangan va amalda boʻlgan barcha ijro farmoyishlari oʻz kuchini yoʻqotadi. Ilgarigi qarorlar, agar ular alohida tartibda oʻzgartirilmagan yoki bekor qilinmagan boʻlsa, amalda qoladi. Hozirda amal qilayotgan favqulodda farmoyishlar ushbu qarorga taalluqli emas.

Bekor qilingan hujjatlar qatorida oʻtgan oyda qabul qilingan, shahar idoralariga Isroilni boykot qilish yoki undan aktivlarni chiqarib olishni taqiqlovchi farmon ham bor. Shuningdek, iyun oyida qabul qilingan va antisemitizmga keng taʼrif berib, Isroilni tanqid qilishning ayrim shakllarini antisemitizm sifatida baholagan koʻrsatma ham bekor qilindi. Biroq Mamdani oldingi maʼmuriyat tomonidan tashkil etilgan antisemitizmga qarshi kurash idorasini saqlab qoldi.

The New York Times nashrining yozishicha, Nyu-York fuqarolik erkinliklari ittifoqi direktori Donna Liberman mazkur farmoyishlar avvalgi mer qoʻshilmagan nuqtai nazarlarni cheklashga qaratilgan soʻnggi choralar boʻlib tuyulganini bildirgan. U yangi maʼmuriyatning ularni bekor qilish qarori kutilmagan holat emasligini ham taʼkidlagan.

1 yanvar kuni Nyu-York tarixida ilk bor saylangan musulmon mer Zohran Mamdani lavozimga kirishish oldidan Qurʼonga qasamyod qilgan. U Demokratik partiyadan nomzod sifatida qatnashib, noyabr oyida boʻlib oʻtgan saylovda ishonchli gʻalabaga erishgan.

Saylov oldidan AQShning sobiq prezidenti Donald Tramp Mamdanining saylanishiga qarshi chiqib, demokratlardan boʻlgan boshqa nomzod — yozda Mamdaniga praymerizda magʻlub boʻlgan Endryu Kuomoga ovoz berishga chaqirgan edi.