Қирғизистонда гуруч атрофида баҳс: контрабандами ёки экспорт сўрови?

Қирғизистон парламенти йиғилишида депутат Бурул Аманова Ўзбекистондан ноқонуний йўл билан олиб кирилган арзон гуруч сабабли Баткен вилоятидаги деҳқонлар ўз маҳсулотини сота олмаётганини билдирди.

Унинг сўзларига кўра, Ўзбекистондан контрабанда орқали кирган гуруч ички бозорда нархларни тушириб юборган ва маҳаллий деҳқонларни қийин аҳволга солган.

Қирғизистон қишлоқ хўжалиги вазири Бакит Торобаев эса бу даъвони инкор қилди. Унинг таъкидлашича, вазият аксинча: Ўзбекистон томони Қирғизистондан гуруч сўраган.

“Ўзбекистон вазири бизда гуруч кам, деб мендан гуруч сўрайди. "Бизга гуруч етказиб беринглар", деб 32 минг тонна гуруч сўради. Мен эса рад жавобини бердим. Яна чегарачиларга айтаман, вазиятни ўрганишсин,” — деди Қирғиз вазири.