Қозоғистонда аёллар учун иш вақти қисқариши мумкин

Ташаббус муаллифи — депутат Ажар Сагандикова бўлиб, у бу борада бош вазир Ўлжас Бектенов номига расмий сўров юборган.

Сагандикованинг айтишича, Қозоғистонда аёллар ҳар куни ўртача 480 дақиқа иш вақтини, қўшимча равишда эса 246 дақиқа уй юмушлари ва қариндошларга ғамхўрлик қилишга сарфлаяпти.

Бу «кунига 13 соатлик юклама» бўлиб, аёлларнинг сурункали чарчаши, ҳиссий толиқиши ва соғлиқ муаммоларига олиб келмоқда. Шунингдек, мамлакатда аёллар ва эркаклар ўртасидаги 15 фоизлик иш ҳақи тафовути уларнинг иқтисодий заифлигини янада кучайтирётгани қайд этилди.

Сагандикова оғир касал ёки алоҳида эҳтиёжли қариндошларга қараётган аёлларнинг кунига қўшимча 6 соат меҳнат қилиши «учинчи иш куни»га айланганини, аммо бу меҳнат қонунчилигида акс этмаганини таъкидлади.

Депутат Меҳнат кодексига ўзгартиш киритиб, фарзандлари ёки бемор қариндошларига қараётган аёллар учун:

• иш ҳақи сақланган ҳолда қисқартирилган иш ҳафтаси,
• мослашувчан график,
• масофавий ишлаш имкониятини устувор тартибда бериш,
• камситишнинг олдини олувчи меъёрлар киритилишини таклиф қилмоқда.

Унинг фикрича, бундай ўзгаришлар аёлларни ижтимоий ва иқтисодий жиҳатдан қўллаб-қувватлашда муҳим қадам бўлади.