Россия армиясига 25 минггача кубалик кўнгиллилар қўшилиши кутилмоқда

Яқин вақт ичида 25 минггача кубалик кўнгилли аскарлар Россия армияси сафига қўшилиши мумкин. Бу ҳақда Forbes Украина расмийлари маълумотларига таяниб хабар берди. Ушбу режа амалга ошса, кубаликлар жанг майдонларидаги энг йирик хорижий контингентга айланади.

Украина ҳарбий разведкаси вакили Андрей Юсов АҚШ Конгресси аъзоларига тақдим этган маълумотда шундай деди:

«Путин режими учун кубалик ёлланма жангчиларни жалб этиш манфаатли. Агар чет эллик ҳалок бўлса — ҳеч қандай нафақа тўланмайди, жавобгарлик йўқ, мамлакат ичида урушига норози бўлган қариндошлар йўқ. Ва, албатта, камроқ россиялик ҳалок бўлади».

Британия разведкаси маълумотига кўра, Россия бир миллиондан ортиқ йўқотишларга учраган. Шу сабаб Кремль Африка, Лотин Америкаси ва Марказий Осиёдан келган хорижликларни ёллаш ёки мажбурлаш орқали сафларни тўлдирмоқда.

Кубаликлар нега кетмоқда

Кўпчилик кубаликлар учун бу молиявий масала. Уларга ойига тахминан 2000 доллар маош ваъда қилинган — бу Кубадаги ўртача 20 долларлик иш ҳақидан юз баравар кўп. Бу сабабдан минглаб одамлар фронтда хизмат қилиш учун шартнома имзолаган. Бошқалар эса Россияда қурилиш ишларига жалб қилинаётганини ўйлаб, алданган ҳолда жанг майдонига юборилган.

Виржиния университети Миллер маркази профессори Кристина Лопес-Готтарди таъкидлаганидек, Куба оғир иқтисодий ва энергетик инқирозда. «Фақат иқтисоднинг ўзи буни кучли омилга айлантиради», дейди у.

Куба ҳукуматининг роли

Гавана тўғридан-тўғри иштирокини инкор этмоқда, аммо, таҳлилчиларнинг фикрича, бундай кўламдаги сафарбарлик Куба ҳокимиятининг яширин розилигисиз амалга ошиши мумкин эмас. Reuters кўрган 2 октябрдаги АҚШ Давлат департаменти ҳужжатида Вашингтоннинг баҳолашича, 1 мингдан 5 минггача кубалик Украинада жанг қилаётгани айтилади.

Украина Олий Радаси депутати Александра Устинова шундай деди:

«КХДР ва Куба жангчилари сиёсий рамзлар, етишмовчилик белгиси эмас. Россия 20 минг кубаликни ёллаган, улардан мингдан ортиғи Украинада, тахминан 40 нафари ўлдирилган — паспортлари бизда далил сифатида бор. Бу Россиянинг “ишончли ҳамкорларимиз бор” деган кўрсаткичи».

Унинг сўзларига кўра, бу авторитар иттифоқчиларга таяниш тенденцияси жаҳон сиёсий тизимини «демократик ва авторитар давлатлар» ўртасида янада кескин бўлиб бўлинишга олиб келмоқда.

Кубанинг манфаатлари

Ратгерс университети профессори Александр Мотилнинг таъкидлашича:

«Кубалик жангчилар жуда яхши маош олади. Агар ўлса — қариндошлари бой бўлади, тирик қолса — қаҳрамон сифатида қайтиб, пул олади. Ҳар ҳолда, мамлакатга маблағ келади, режим эса буни ўз ютуғи сифатида кўрсатади».

Унинг фикрича, Куба шу йўл билан инқилобий имижини мустаҳкамлаб, Вашингтонга қарши сиёсий ишора қилмоқда.

Россиянинг заиф томони

Мотиль шундай таъкидлайди:

«Куба, КХДР ёки Африка ва Марказий Осиёдан жангчилар ёллаш — заифлик ва эҳтимол, умидсизлик белгисидир. Россияликлар бефойда жангларда ўлишни хоҳламаяпти, шунинг учун Путин уларнинг ўрнига чет элликларни юборяпти».

Июль 2025 йилга келиб, Украинадаги (рус фуқароларидан ташқари) маҳбусларнинг 49 фоизи чет элликлардан иборат бўлган — 2022 йилда бу кўрсаткич атиги 1 фоиз эди. Украина Хавфсизлик ва ҳамкорлик маркази раиси Сергий Кузан таъкидлаганидек, «хорижий ёлланмаларсиз Москва ҳужум операцияларини давом эттира олмасди».

Африка ва Осиёдан ёлланмалар

Bloomberg’нинг 2024 йил июнидаги текширувига кўра, Кремль минглаб африкалик талабалар ва меҳнат мигрантларини армияга қўшилишга мажбурлаган, рад этганлар депортация билан таҳдид қилинган. The Telegraph’нинг 2025 йил июнидаги суриштирувида эса Камерун, Сенегал ва Зимбабведан келган африкаликлар «шампун заводи» ёки ошхона иши ваъдалари билан алданиб, бир ҳафталик тайёргарликдан кейин фронтга юборилгани аниқланган.

Авторитар иттифоқчилар ўқи

Бу жараён фақат жангчилар билан чегараланмайди. Россия, КХДР, Эрон, Венесуэла ва Кубани боғловчи ҳарбий ҳамкорлик ўқи шаклланмоқда — улар қурол, технология ва тажрибалар билан алмашмоқда.

Ҳадсон институти таҳлилчиси Люк Коффи шундай деди:

«КХДР ва Эрон Россия билан ҳамкорлик орқали технологиялар, жумладан сувости ядровий ракета дастурларини ривожлантиришда ёрдам оляпти».

Одесса миллий университети профессори Владимир Дубовик қўшимча қилди:

«Бу фақат шартнома эмас, балки авторитар армиялар учун умумий ўқув майдонига айланмоқда».

Замонавий уруш мактаби

“Peace Through Strength Institute” муассиси Билл Коулнинг таъкидлашича, бу хавф Украинадан ташқарига ҳам ёйилиши мумкин:

«Ҳар бир чет эллик бўлинма бугун дунёдаги илк катта дрон урушида иштирок этиб, бу технологияни бошқа жанг майдонларига олиб чиқишни ўрганмоқда».

Қисқаси, Кремль учун кубалик ва шимолий кореялик жангчилар — урушни ички қаршиликсиз олиб боришнинг қулай усули. Улар учун эса бу — замонавий дрон ва электрон уруш тажрибасини ўрганишнинг мисли кўрилмаган имкониятидир.