Талас шаҳрининг 82 йиллигига бағишланган тадбир бекор қилинди

Талас вилоятида ўсмир Б.Т.ни қидириш чоғида Фавқулодда вазиятлар вазирлиги  ғаввосининг ҳалок бўлиши ортидан Талас шаҳрининг 82 йиллигига бағишланган тадбирлар номаълум муддатга қолдирилди.

Мавжуд маълумотларга кўра, президентнинг Талас вилоятидаги мухтор вакили Эрмат Жумаев вилоятда режалаштирилган барча тадбирлар кечиктирилганини маълум қилган.

Қутқарувчи-ғаввос Асқар Қозибеков Талас дарёсида ўсмирни қидираётганда жароҳат олган. Унга тиббий ёрдам кўрсатилишига қарамай, ҳаётини сақлаб қолишнинг имкони бўлмади.

Асқар Қозибеков 1994-йилда туғилган. Унинг ортидан турмуш ўртоғи ва бир нафар қизи қолди.

“Ҳалок бўлган ғаввоснинг оила аъзолари ва яқинларига чуқур ҳамдардлик изҳор этаман”, — дея таъкидлади Эрмат Жумаев.

Шунингдек, у юз берган фожиа муносабати билан вилоят аҳли ва юртдошларига мурожаат қилди.