Қозоғистонда 19 нафар ҳарбий денгизга оқиб кетди: 9 киши ҳалок бўлди

Ҳодиса 24 сентябрь куни Қозоғистон Қуролли Кучлари Ҳарбий-денгиз кучларининг машғулотлари вақтида содир бўлган. Мамлакат Мудофаа вазирлиги маълум қилишича, ҳарбийлар Каспий денгизи соҳилида ўқув-жанговар вазифани бажараётган пайтда об-ҳаво шароити кескин ёмонлашиб, шамол кучайган
.
Дастлабки маълумотларга кўра, 19 нафар ҳарбий хизматчи денгизга оқиб кетган. Улардан 9 нафари ҳалок бўлган, 3 нафари қутқарилган. Қутқарилганлардан бири шифохонага ётқизилган. Қолган ҳарбийларни излаш ишлари давом этмоқда.

Қидирув-қутқарув операциясида Қозоғистон Ҳарбий-денгиз кучлари, Фавқулодда вазиятлар вазирлиги, авиация ва бошқа хизматлар иштирок этмоқда.

Ҳодиса сабабларини аниқлаш ҳамда қидирув-қутқарув ишларини мувофиқлаштириш учун Қозоғистон Мудофаа вазири Даурен Косанов бошчилигидаги комиссия воқеа жойига юборилган. Вазирлик ҳалок бўлган ҳарбийларнинг яқинларига таъзия билдириб, уларнинг оилаларига зарур ёрдам кўрсатилишини маълум қилди.

Қозоғистон Мудофаа вазирлиги қидирув операцияси ва ҳарбий хизматчилар ҳолати ҳақидаги қўшимча маълумотлар расмий маълумотлар тасдиқлангани сари эълон қилинишини билдирган.

Муаллиф: Ҳасанбой ОЧУН