Трамп Сурияни терроризмга ҳомийлик қилувчи давлатлар рўйхатидан чиқармоқда

Доналд Трамп 8 июль куни суриялик ҳамкасби Аҳмад аш-Шараага Сурияни АҚШнинг терроризмга ҳомийлик қилувчи давлатлар рўйхатидан чиқаришга қарор қилганини айтди. Бу ҳақда Reuters ёзди.

“Мен мамлакатингизни қайта тиклашга тўсқинлик қилаётган барча тўсиқларни олиб ташлашга ваъда берганман”, — деб ёзган Трамп Шараага йўллаган мактубида.

“Бизда Сурияга сармоя киритиб, мамлакатингизни ҳар қачонгидан-да буюк ва фаровон қилишга шай АҚШ компаниялари бор”, — дея қўшимча қилган у Анқарадаги учрашувдан сўнг Шараага топширилган мактубда.

Трампнинг сўзларига кўра, у Конгрессни хабардор қилган. Энди Конгресс қарор кучга киргунга қадар 45 кунлик кўриб чиқиш жараёнини ўтказади.

Қарорнинг иқтисодиётга таъсири

Бирор давлатнинг терроризм ҳомийси деб топилиши АҚШнинг ташқи ёрдами, мудофаа маҳсулотлари экспорти ва айрим молиявий операцияларига чекловлар жорий этилишига олиб келади.

Сурия Марказий банки раиси Сафват Раслоннинг Тelegram'даги постида айтилишича, АҚШнинг бу қадами инвестициялар ва иқтисодий тикланиш учун кенгроқ имкониятлар яратиб, Суриянинг жаҳон иқтисодиётига қайта интеграциялашувини таъминлайди.

2025 йилда Трамп АҚШнинг Сурияга қарши санкциялар дастурини бекор қилиш тўғрисидаги фармонни имзолаб, мамлакатнинг халқаро молия тизимидан ажралиб қолишига барҳам берди.

Саудия Арабистонининг бир қанча ширкатлари Ар-Риёднинг Сурияни тиклаш ҳаракатлари доирасида миллиардлаб долларлик сармоя киритишни режалаштирмоқда, Форс кўрфазининг бошқа давлатлари ҳам молиявий ёрдам ваъда қилган.

Аҳмад аш-Шараа — собиқ “Ал-Қоида” қўмондони

Шараа аввал “Ал-Қоида”нинг Суриядаги “Нусра фронти” қўмондони бўлиб, 2016 йилда гуруҳ билан алоқаларни узган. Кейинроқ 2024 йил охирида Асадни ағдариш учун исломий исёнчилар гуруҳлари коалициясига бошчилик қилган.

Ҳокимиятга келганидан сўнг Шараа халқаро ҳамжамият билан алоқаларни тиклашни устувор мақсад қилиб белгилади. Унинг маъмурияти АҚШ ва Европа давлатлари билан мулоқотни йўлга қўйиб, хорижий инвестицияларни жалб этиш ҳамда Сурияни халқаро молия тизимига интеграциялашга интилмоқда.

Трамп Шараанинг минтақадаги “Исломий давлат” жангари гуруҳига қарши ҳаракатларини қўллаб-қувватлади.