Tramp Suriyani terrorizmga homiylik qiluvchi davlatlar ro‘yxatidan chiqarmoqda

Donald Tramp 8-iyul kuni suriyalik hamkasbi Ahmad ash-Sharaaga Suriyani AQSHning terrorizmga homiylik qiluvchi davlatlar ro‘yxatidan chiqarishga qaror qilganini aytdi. Bu haqda Reuters yozdi.

“Men mamlakatingizni qayta tiklashga to‘sqinlik qilayotgan barcha to‘siqlarni olib tashlashga va’da berganman”, — deb yozgan Tramp Sharaaga yo‘llagan maktubida.

“Bizda Suriyaga sarmoya kiritib, mamlakatingizni har qachongidan-da buyuk va farovon qilishga shay AQSh kompaniyalari bor”, — deya qo‘shimcha qilgan u Anqaradagi uchrashuvdan so‘ng Sharaaga topshirilgan maktubda.

Trampning so‘zlariga ko‘ra, u Kongressni xabardor qilgan. Endi Kongress qaror kuchga kirgunga qadar 45 kunlik ko‘rib chiqish jarayonini o‘tkazadi.

Qarorning iqtisodiyotga ta'siri

Biror davlatning terrorizm homiysi deb topilishi AQShning tashqi yordami, mudofaa mahsulotlari eksporti va ayrim moliyaviy operatsiyalariga cheklovlar joriy etilishiga olib keladi.

Suriya Markaziy banki raisi Safvat Raslonning Telegram’dagi postida aytilishicha, AQShning bu qadami investitsiyalar va iqtisodiy tiklanish uchun kengroq imkoniyatlar yaratib, Suriyaning jahon iqtisodiyotiga qayta integratsiyalashuvini ta’minlaydi.

2025-yilda Tramp AQSHning Suriyaga qarshi sanksiyalar dasturini bekor qilish to‘g‘risidagi farmonni imzolab, mamlakatning xalqaro moliya tizimidan ajralib qolishiga barham berdi.

Saudiya Arabistonining bir qancha shirkatlari Ar-Riyodning Suriyani tiklash harakatlari doirasida milliardlab dollarlik sarmoya kiritishni rejalashtirmoqda, Fors ko‘rfazining boshqa davlatlari ham moliyaviy yordam va’da qilgan.

Ahmad ash-Sharaa — sobiq “Al-Qoida” qo'mondoni

Sharaa avval “Al-Qoida”ning Suriyadagi “Nusra fronti” qo‘mondoni bo‘lib, 2016-yilda guruh bilan aloqalarni uzgan. Keyinroq 2024-yil oxirida Asadni ag‘darish uchun islomiy isyonchilar guruhlari koalitsiyasiga boshchilik qilgan.

Hokimiyatga kelganidan so‘ng Sharaa xalqaro hamjamiyat bilan aloqalarni tiklashni ustuvor maqsad qilib belgiladi. Uning ma'muriyati AQSH va Yevropa davlatlari bilan muloqotni yo‘lga qo‘yib, xorijiy investitsiyalarni jalb etish hamda Suriyani xalqaro moliya tizimiga integratsiyalashga intilmoqda.

Tramp Sharaaning mintaqadagi “Islomiy davlat” jangari guruhiga qarshi harakatlarini qo‘llab-quvvatladi.