Венесуэлада 1200 дан ортиқ маҳбус исён кўтарди

Бу ҳақда “Observatorio Venezolano de Prisiones” нодавлат ташкилоти маълум қилди.

Ҳуқуқ ҳимоячиларига кўра, эрталаб давлат мадҳияси янграганидан кейин 1200 дан зиёд эркак ва 100 дан ортиқ аёл маҳбус маъмуриятга бўйсунишдан бош тортган.

Норозиликларга қамоқхонага янги директор Элвис Макуаре Герреро тайинланганидан кейин шароитлар кескин оғирлашгани сабаб бўлгани айтилмоқда. Ташкилот маълумотига кўра, маҳбуслар раҳбарият алмашганидан сўнг шафқатсиз тинтувлар, калтаклашлар ва қийноқлар бошланганини даъво қилган. Шунингдек, 120 дан ортиқ маҳбус ҳеч қандай изоҳсиз изоляторларга жойлаштирилган.

Кўп ўтмай, маҳбусларнинг бир қисми қамоқхона бинолари томига чиқиб, матрасларга ўт қўйган. Ташкилот қамоқхона ҳудудида отишма бўлгани ва ярадорлар борлигини маълум қилди.

Гувоҳлар сўзларига кўра, Венесуэла Миллий гвардияси қамоқхона ҳудудига кирганидан кейин портлаш ва ўқ овозлари эшитилган. Аёллар корпусида эса кўздан ёш оқизувчи газ ишлатилгани айтилмоқда.

Ҳуқуқни ҳимоя қилиш ташкилотлари Венесуэла прокуратураси ва омбудсманини вазиятга зудлик билан аралашишга чақирган. Мамлакат расмийлари ҳозирча ҳодиса юзасидан расмий баёнот бермади.

Маълумот учун, бундан олдин Мексиканинг Пуэрто-Вальярта шаҳридаги қамоқхонада ҳам оммавий тартибсизликлар ортидан 23 нафар маҳбус қочиб кетган эди.