Хитойда кўмир конидаги портлаш оқибатида 90 киши ҳалок бўлди

Шанба куни Хитой давлат телерадиокомпанияси Шанси провинциясидаги кўмир конида содир бўлган газ портлаши оқибатида ҳалок бўлганлар сони 90 кишига етганини хабар қилди.

Аввалроқ “Синхуа” ахборот агентлиги жума куни кечқурун Синюан округидаги “Люшеню” кўмир конида газ портлаши рўй бергани, ўша пайтда ер остида 247 нафар кончи навбатчиликда бўлганини маълум қилганди.

“Синхуа”нинг ёзишича, Хитой Раиси Си Сзинпин ҳукумат вакилларини жароҳатланганларни даволаш ҳамда қидирув-қутқарув ишларини олиб боришда барча кучларни сафарбар этишга чақирган.

Шунингдек, фожиа сабабларини пухта ўрганишни ва айбдорларни қонунга мувофиқ қатъий жавобгарликка тортишни буюрган.

Синюан фавқулодда вазиятлар бошқармасининг маълум қилишича, қутқарув ишлари давом этмоқда ва бахтсиз ҳодиса сабаблари ўрганилмоқда.

Хитой 2000 йилларнинг бошидан бери қатъийроқ қоидалар ва хавфсизроқ амалиётлар орқали газ портлашлари ёки сув тошқинлари сабабли юзага келадиган кўмир конларидаги ўлим ҳолатларини сезиларли даражада камайтирди.

Бироқ Люшеню фожиаси Хитойда сўнгги ўн йилликда қайд этилган энг йирик қурбонли ҳодисалардан бири бўлди.

Конь учун масъул бўлган ширкат раҳбарлари қўлга олинди, дея хабар беради “Синхуа” агентлиги.

Аввалроқ “Синхуа” агентлиги атиги саккиз киши ҳалок бўлгани, 200 дан ортиқ одам эса ер юзасига хавфсиз олиб чиқилганини маълум қилган эди. Агентлик қурбонлар сонидаги кескин ўсиш сабабини изоҳламаган.