Тайван можароси Иккинчи жаҳон урушидан ҳам хавфли – АҚШ вакили

Тайван бўғозида юз бериши мумкин бўлган можаро глобал иқтисодиётга Иккинчи жаҳон урушидан ҳам катта зарар етказиши мумкин.

Бу ҳақда 9 сентябрь куни Тайпей хавфсизлик форумида Американинг Тайвандаги институти директори Рэймонд Грин айтди.

Грин можаронинг инсоний оқибатларидан ташқари, унинг жаҳон иқтисодиётига таъсири ниҳоятда катта бўлишини таъкидлади. Унинг сўзларига кўра, ҳозир энг муҳими – Тайван бўғозида тинчликни сақлаб қолиш масаласи.

АҚШ – Хитой саммитига умид

Грин яқинлашаётган АҚШ–Хитой саммитини икки давлат ўртасидаги стратегик барқарорликни мустаҳкамлаш имконияти сифатида баҳолади.

Хитой раҳбари Си Сзиньпин сентябрь охирида АҚШга бориб, президент Дональд Трамп билан учрашиши кутилмоқда. Грин АҚШнинг Ҳинд-Тинч океани минтақасидаги фаолияти ва ҳамкорликларини кучайтираётганини қайд этди.

«Ягона Хитой»

Хитой Тайван бўйича «Ягона Хитой» позициясида қатъий турибди. Хитой Тайван билан материкнинг бирлашувини «тўхтатиб бўлмайдиган тарихий тенденция» деб атамоқда. Пекин тинч йўл билан бирлашув афзаллигини айтса-да, куч ишлатишдан ҳам воз кечмаган.

Тайван ҳукумати эса Пекиннинг орол устидан даъволарини рад этади. Тайпей мудофаа салоҳиятини кучайтирмоқда ва 2027 йил учун мудофаа харажатларини илк бор 1 триллион Тайван долларидан оширишни режалаштирган.