Xitoyda ko‘mir konidagi portlash oqibatida 90 kishi halok bo'ldi

Shanba kuni Xitoy davlat teleradiokompaniyasi Shansi provinsiyasidagi ko‘mir konida sodir bo‘lgan gaz portlashi oqibatida halok bo‘lganlar soni 90 kishiga yetganini xabar qildi.

Avvalroq “Sinxua” axborot agentligi juma kuni kechqurun Sinyuan okrugidagi “Lyushenyu” ko‘mir konida gaz portlashi ro‘y bergani, o‘sha paytda yer ostida 247 nafar konchi navbatchilikda bo‘lganini ma’lum qilgandi.

“Sinxua”ning yozishicha, Xitoy Raisi Si Szinpin hukumat vakillarini jarohatlanganlarni davolash hamda qidiruv-qutqaruv ishlarini olib borishda barcha kuchlarni safarbar etishga chaqirgan.

Shuningdek, fojia sabablarini puxta o‘rganishni va aybdorlarni qonunga muvofiq qat’iy javobgarlikka tortishni buyurgan.

Sinyuan favqulodda vaziyatlar boshqarmasining ma’lum qilishicha, qutqaruv ishlari davom etmoqda va baxtsiz hodisa sabablari o‘rganilmoqda.

Xitoy 2000-yillarning boshidan beri qat’iyroq qoidalar va xavfsizroq amaliyotlar orqali gaz portlashlari yoki suv toshqinlari sababli yuzaga keladigan ko‘mir konlaridagi o‘lim holatlarini sezilarli darajada kamaytirdi.

Biroq Lyushenyu fojiasi Xitoyda so‘nggi o‘n yillikda qayd etilgan eng yirik qurbonli hodisalardan biri bo‘ldi.

Kon uchun mas’ul bo‘lgan shirkat rahbarlari qo‘lga olindi, deya xabar beradi “Sinxua” agentligi.

Avvalroq “Sinxua” agentligi atigi sakkiz kishi halok bo‘lgani, 200 dan ortiq odam esa yer yuzasiga xavfsiz olib chiqilganini ma’lum qilgan edi. Agentlik qurbonlar sonidagi keskin o‘sish sababini izohlamagan.