Япония бош вазири истеъфога чиқишга қарор қилди

Япониянинг Либерал-демократик партияси (ЛДП) раиси ва бош вазири Шигеру Ишиба жорий ой охирига қадар истеъфога чиқиш ниятида. Бу ҳақда 23 июль куни Япониянинг “Йомиури” нашри хабар берди.

Маълумотларга кўра, Ишиба бу ҳақда ўз атрофидаги ҳамкасбларига аллақачон маълум қилган. У 23 июлда ЛДПнинг бош маслаҳатчиси Таро Асо, губернатор ўринбосари Ёшихидэ Суга ва собиқ бош вазир Фумио Кисида билан учрашиши режалаштирилгани маълум қилинди.

20 июль куни бўлиб ўтган сайловларда ЛДП ва унинг коалициядаги ҳамкори “Комэйто” партияси парламентнинг юқори палатаси — маслаҳатчилар палатасидаги кўпчилик ўринларини йўқотди. Улар жами 47 мандат (ЛДП — 39, “Комэйто” — 8) олди, бу эса талаб қилинадиган 50 ўринга етмади (палатада жами 125 ўрин бор).

Сайловдаги мағлубият ортидан партия ичида Ишибанинг истеъфосини талаб қилувчи чақириқлар кучайди. 22 июлдан эса партияда муддатдан олдинги сайловларни ўтказиш учун имзо йиғиш кампанияси бошланди.

Бош вазир Шигеру Ишиба ўз баёнотида АҚШ билан тарифлар масаласидаги музокаралар якунлангандан сўнг истеъфога чиқишини маълум қилди.