Хитой Тинч океанига баллистик ракета учирди

Хитой ҳарбийлари 6 июль куни синов мақсадида атом сувости кемасидан Тинч океанига ракета учирди, бу эса АҚШ, Япония, Австралия, Янги Зеландия ва Тайваннинг танқиди ҳамда хавотирларини кучайтирди.

Халқ озодлик армияси ҳарбий-денгиз кучларининг сувости кемаси соат 12:01 да Тинч океанида сохта жанговар каллакли ракетани учирди, дея маълум қилди расмий “Sinxua” ахборот агентлиги ҳам.

“Sinxua”нинг таърифлашича, Хитойнинг йиллик ҳарбий машғулотлари доирасидаги бу учириши бирон-бир давлат ёки нишонга қаратилмаган “одатий тадбир”дир.

Хитой Ташқи ишлар вазирлиги матбуот котиби Мао Нингнинг сўзларига кўра, синов тўлиқ хавфсиз, меъёрларга мувофиқ ва профессионал тарзда амалга оширилган.

“Алоқадор давлатлар бу масалани ортиқча талқин қилмайди, деган умиддамиз”, — деди у Пекиндаги брифингда.

АҚШ давлат департаменти вакили Томми Пиготт ўз баёнотида Қўшма Штатлар Хитой сувости кемасидан учирилиб, Тинч океанининг жанубий қисмига тушган қуролсиз қитъалараро баллистик ракетасини кузатганини айтди.

JL-3 ракетаси

“Sinxua” Хитойнинг қандай турдаги ракета учирганига аниқлик киритмаган.

“Global Times” нашрига кўра, бу ўтган йили ҳарбий парадда намойиш этилган Пекиннинг энг замонавий, сувости кемасидан учириладиган JL-3 ракетаси бўлиши мумкин.

Пентагон ҳисоботига қараганда, ушбу ракета Хитой қирғоқларидан туриб континентал АҚШ ҳудудига етиб боролади.

Тинч океани минтақасидаги қудратли давлатлар – Австралия, Янги Зеландия ва Японияга синов ҳақида қисқа муддат олдин хабар берилган.

Тайван муносабати

Тайван президенти идораси мазкур синовни Хитойнинг халқаро ҳамжамиятни қўрқитишга уриниши деб баҳолади.

Хитой ўз ҳудуди деб даъво қиладиган, демократик бошқарувдаги ушбу орол анчадан бери Пекиннинг ҳарбий фаоллиги кучаяётганидан огоҳлантириб келади.

Тайван хавфсизлик хизматининг юқори мартабали расмийси 6 июль куни, ҳарбий машғулотлар авжига чиққан пайтда, Хитой ҳарбий-денгиз кучлари ҳаракатларида “ўсиш тенденцияси” тенденцияси, жумладан, Россия билан қўшма машғулотлар ўтказилаётганини маълум қилди.

Янги Зеландия ва Япония хавотирда

Янги Зеландия ташқи ишлар вазири Уинстон Питерс синовни ножўя ва ташвишли ҳодиса эканлигини айтди. “Биз бошқа қўшниларимиз каби, Хитойнинг Тинч океани жанубидан ракета салоҳиятини синаш полигони сифатида фойдаланишидан манфаатдор эмасмиз” - деди у.

Япония эса бўлажак ракета учирилиши ҳақида хабардор этилганида Хитой ҳарбийларининг фаоллашувидан жиддий хавотирдалигини билдириб, Пекинни бу қарорини қайта кўриб чиқишга ундаган.

Хитой сўнгги бор қитъалараро баллистик ракетани 2024 йилда тажрибадан ўтказганда, дунё унинг ҳарбий салоҳияти юксалиб бораётганига гувоҳ бўлганди.