Зеленский: Украина «Фламинго» ракеталари Россияда «қишлайди»

Украина президенти Владимир Зеленский мамлакатнинг узоқ масофага зарба бериш имкониятига эга қуролларини ишлаб чиқариш ҳажмини янада ошириш зарурлигини айтди. У бу ҳақда Украина Мустақиллик куни муносабати билан йўллаган мурожаатида маълум қилди.

Зеленскийнинг таъкидлашича, Украина мудофаа-саноат мажмуаси сутка давомида ишламоқда. Мамлакатда миллионлаб FPV-дронлар ва ўқ-дорилар ишлаб чиқарилаётгани, бироқ Киев бу кўрсаткичларни янада оширишни режалаштираётгани айтилди.

Украина президенти қуруқликда ҳаракатланувчи роботлаштирилган мажмуалар, денгиз дронлари ва узоқ масофали зарба бериш тизимларининг аҳамиятини ҳам қайд этди.

Зеленский «Фламинго» ракеталарига алоҳида тўхталиб, улар камдан-кам қўлланадиган восита эмас, балки оммавий ишлаб чиқарилиши кераклигини билдирди.

«“Фламинго” камёб тур эмас, оммавий “қуш” бўлиши керак. Улар Россияда “қишлаши” керак», — деди Зеленский.

Украина президенти, шунингдек, Россиянинг баллистик зарбаларига қарши чораларни излаш давом этаётганини ва Киев ўзининг узоқ масофали зарба бериш имкониятларини кучайтириш ниятида эканини маълум қилди.