Комил Алламжонов Президент администрациясининг АҚШдаги вакили этиб тайинланди

Бу ҳақда Президент матбуот котиби Шерзод Асадов маълум қилди.

Шу билан бирга, Комил Алламжонов Ўзбекистон Республикаси Президенти администрацияси раҳбарининг маслаҳатчиси сифатидаги фаолиятини ҳам давом эттиради.

Бундан аввал Жорж Вашингтон университети ҳузуридаги Европа, Россия ва Евроосиё тадқиқотлари институти (IERES)нинг Марказий Осиё дастури (CAP) жаноб Комил Алламжоновнинг мазкур дастурнинг махсус маслаҳатчиси этиб тайинланганини эълон қилган эди.

Ўзбекистон президенти администрациясининг АҚШдаги вакили лавозими

Ташқи сиёсий ва давлат ташаббусларини мувофиқлаштириш самарадорлигини ошириш мақсадида 2026 йил 1 январдан Ўзбекистоннинг АҚШдаги элчихонаси тузилмасига қўшимча маслаҳатчи-элчи — Президент администрациясининг АҚШдаги вакили лавозими киритилиши ҳақида хабар берилган эди. Президентнинг 12 ноябрдаги фармонига кўра, маслаҳатчи-элчини тайинлаш ва лавозимдан озод этиш, шунингдек унинг фаолияти регламентини тасдиқлаш Президент администрацияси раҳбари томонидан амалга оширилади.

Маслаҳатчи-элчи ўз фаолиятида Президент администрацияси раҳбарига ҳисобдор ва Ўзбекистоннинг АҚШдаги дипломатик ваколатхонаси раҳбари фаолиятини икки томонлама муносабатларни ривожлантириш йўналишида қўллаб-қувватлашга масъул ҳисобланади.

Маслаҳатчи-элчи зиммасига қуйидаги вазифалар юклатилади:

• Ўзбекистон ва АҚШда йирик ва стратегик инвестиция ҳамда савдо лойиҳаларини амалга ошириш масалалари бўйича бевосита ташаббус кўрсатиш ва муҳокама олиб бориш;
• Ўзбекистон томонидан Америка—Ўзбекистон ишбилармонлик ва инвестиция кенгаши ишини комплекс мувофиқлаштириш.

Фармонга кўра, Ташқи ишлар вазирлиги Инвестициялар, саноат ва савдо вазирлиги билан биргаликда уч ҳафта муддатда Ўзбекистоннинг АҚШдаги элчихонаси ходимлари штат бирлигини кўпайтириш тўғрисида таклиф киритиши лозим.

Бир ой муддатда АҚШ ҳудудида қўшимча консулхоналар очиш масаласи ишлаб чиқилади. Бунда географик қамровни таъминлаш мақсадида АҚШнинг асосий транспорт ва иқтисодий марказлари, шунингдек ватандошлар диаспораси кўп жойлашган ҳудудлар (Филадельфия, Чикаго, Орландо ва Сиэтл шаҳарлари) инобатга олинади.

Шунингдек, АҚШнинг барча штатларида яшаётган ўзбек диаспоралари билан самарали ҳамкорлик моделини ишлаб чиқиш ва уни муваффақиятли амалга ошириш — АҚШда янгидан ташкил этилаётган консулхоналарнинг асосий вазифаларидан бири этиб белгилаб қўйилган.