Алишер Навоий номидаги давлат адабиёт музейи ёпилгани айтилмоқда

Шукур Жабборнинг мурожаат шаклидаги Facebook'да эълон қилган постида айтилишича, Алишер Навоий номидаги давлат адабиёт музейи 1968 йилдан буён таъмирланмаган.

Натижада 70 000 яқин ноёб экспонат хавф остида қолган.

Энди эса бу хавф янада кучайиб, музей бошқа жойга кўчириб юборилаётгани айтилмоқда. Аммо музей учун қаердан жой ажратилгани номаълум.

Аксарият экспонатлар вақтинча Ислом цивилизация марказининг ертўласига жойлаштирилган.

“Дунё бўйича моддиятга берилиш ва адабиётдан узоқлашиш кечаётган бугунги кунда мактаб ўқувчилари адабиёт муаллимлари томонидан “мажбуран”, текин томоша учун келтириладиган бу маскан уларга кўп асрлик бой адабий тарихимизнинг ноёб дурдоналари билан таништирибгина қолмай Марказий Осиё маданияти ва санъатининг бадиий намуналари-китоб, тасвирий санъат, хаттотлик, наққошлик, мусиқа ва меъморчилик асарлари билан ҳам таништириш имкониятига эга эди” – дейди Шукур Қурбон.

1933-1936 йилларда қурилган ушбу бино 1968 йили буюк алломанинг 525 йиллик юбилейи муносабати билан Алишер Навоий номидаги Давлат Адабиёт музейига айлантирилган. У Халқаро музейлар кенгаши – ICOM ташкилоти аъзоси эди.

“Жаноб Президент! Юқорида айтганимдек, Алишер Навоий номидаги давлат адабиёт музейини яшаб қолиши сизга боғлиқ! Музейни сақлаб қолинг! Ҳурмат билан, Ўзбек зиёлилари номидан ёзувчи Шукур Жаббор”, – деб якунланган мурожаат.