Alisher Navoiy nomidagi davlat adabiyot muzeyi yopilgani aytilmoqda

Shukur Jabborning murojaat shaklidagi Facebook’da e’lon qilgan postida aytilishicha, Alisher Navoiy nomidagi davlat adabiyot muzeyi 1968-yildan buyon ta’mirlanmagan.

Natijada 70 000 yaqin noyob eksponat xavf ostida qolgan.

Endi esa bu xavf yanada kuchayib, muzey boshqa joyga ko‘chirib yuborilayotgani aytilmoqda. Ammo muzey uchun qayerdan joy ajratilgani noma’lum.

Aksariyat eksponatlar vaqtincha Islom sivilizatsiya markazining yerto‘lasiga joylashtirilgan.

“Dunyo bo‘yicha moddiyatga berilish va adabiyotdan uzoqlashish kechayotgan bugungi kunda maktab o‘quvchilari adabiyot muallimlari tomonidan “majburan”, tekin tomosha uchun keltiriladigan bu maskan ularga ko‘p asrlik boy adabiy tariximizning noyob durdonalari bilan tanishtiribgina qolmay Markaziy Osiyo madaniyati va san’atining badiiy namunalari-kitob, tasviriy san’at, xattotlik, naqqoshlik, musiqa va me’morchilik asarlari bilan ham tanishtirish imkoniyatiga ega edi” – deydi Shukur Qurbon.

1933-1936-yillarda qurilgan ushbu bino 1968-yili buyuk allomaning 525-yillik yubileyi munosabati bilan Alisher Navoiy nomidagi Davlat Adabiyot muzeyiga aylantirilgan. U Xalqaro muzeylar kengashi – ICOM tashkiloti a’zosi edi.

“Janob Prezident! Yuqorida aytganimdek, Alisher Navoiy nomidagi davlat adabiyot muzeyini yashab qolishi sizga bog‘liq! Muzeyni saqlab qoling! Hurmat bilan, O‘zbek ziyolilari nomidan yozuvchi Shukur Jabbor”, – deb yakunlangan murojaat.