Сунъий интеллектда яратилган актёр ва сценарийларга “Оскар” берилмайди

Жума куни “Оскар” мукофоти ташкилотчилари кино саноатининг энг юксак совринларига сазовор бўлиш учун актёрлик маҳорати ва сценарий муаллифлиги сунъий интеллект томонидан эмас, балки инсон томонидан бажарилиши шартлигини белгиловчи янги қоидаларни эълон қилди.

Генератив сунъий интеллект кино ва телевидение соҳасида катта ташвиш уйғотди. Ходимлар студиялар харажатларни камайтириш мақсадида ушбу технологиядан инсон меҳнати ўрнида фойдаланишидан қўрқишмоқда.

Ўтган йили сунъий интеллект ёрдамида яратилган ва Тилли Норвуд деб номланган “актриса”нинг дебюти ҳамда унинг продюсерига билдирилаётган қизиқишлар ва  мақтовлар мавжуд хавотирларни кучайтириб, SAG-AFTRA актёрлар уюшмасининг кескин норозилигига сабаб бўлди.

Академиянинг янги қоидаларига кўра, киноижодкорлар сунъий интеллект воситаларидан фойдаланиши мумкин, бироқ Норвуд каби “синтетик” актёр “Оскар” мукофотига даъвогарлик қила олмайди.

Шунингдек, баёнотда сценарийлар кўриб чиқилиши учун “инсон томонидан ёзилган” бўлиши кераклиги таъкидланган.

Академия топширилган ишлар инсон томонидан яратилганини текшириш учун қўшимча маълумот талаб қилиши мумкин.