Туркиялик репер Lvbel C5 га турк адабиётини ўрганиш шарти қўйилди

Сулаймон Бурак Бодур (тахаллуси Lvbel C5) Asya Alizade билан бирга куйлаган «Kahpe» номли қўшиғининг матни юзасидан олиб борилаётган тергов доирасида қўлга олинди.

Айбловларни тан олмади

Прокуратурада кўрсатма берган Lvbel C5 ўзига қўйилган айбловларни рад этди. У қилинган шикоятлардан хабар топгач, қўшиқни барча рақамли платформалардан олиб ташлаганини айтди.

Қўшиқдаги зўравонлик мазмунига эга иборалар ҳақидаги саволга жавоб берар экан, санъаткор сўзларни хаёлот маҳсули сифатида ёзганини таъкидлади.

«Мен қўшиқ сўзларини хаёл суриб ёзаман. Бу сўзлар замирида ҳеч қандай ғаразли мақсадим йўқ. У ерда гап зўравонлик ҳақида кетаётгани йўқ, булар шунчаки ёшлар учун мўлжалланган тўқима сўзлар, холос».

Бодур қўшиқдаги бошқа баҳсли сўзлар ўзи билан дуэт куйлаган Asya Alizade га тегишли эканини таъкидлади ва ўзига нисбатан қўйилган айбловларни рад этди.

Прокуратура Бодурни «жиноят содир этишга ошкора даъват қилиш» айблови билан ҳибсга олишни сўраб, жиноят ишлари бўйича сулҳ судига юборди.

Унга қандай шартлар қўйилди?

Ишдаги далиллар ҳолатини ва гумонланувчининг қочиб кетиш эҳтимоли йўқлигини инобатга олган суд қамоққа олиш чорасини асоссиз деб топди ва талабни рад этди.

Lvbel C5 га нисбатан суд назорати чораларини қўллаш бўйича қарор қабул қилинди.

Бодурга мамлакатдан чиқиш тақиқланди ҳамда ҳафтанинг душанба ва чоршанба кунлари полиция бўлимига бориб, имзо чекиб туриш мажбурияти юклатилди.

Реперга нисбатан чиқарилган қарорда турк адабиёти бўйича таълимни давом эттириш шарти ҳам ўрин олди. Қўшиқ матнлари юзасидан олиб борилган тергов доирасида чиқарилган мазкур талаб шов-шувларга сабаб бўлди.