Париж-2024: Ўзбекистон делегацияси ҳисобига кумуш медаль қўшилди

Дастлаб пара велоспорт бўйича эркаклар ўртасида C2 классида шоссе йўналишида вақт пойгаси дастурида иштирок этган Ўзбекистон делегацияси аъзоси Ғолиббек Мирзаёров 2 дақиқа 21.66 сония натижа кўрсатиб, 7-ўринни банд этди. Аммо пара спортчи қайд етган ушбу натижа саралашдан ўтиш учун етарли бўлмади.

Пара спортчи Дмитрий Хорлин эркаклар ўртасида S13 классида 100 метрга эркин усулда сузиш бўйича ўтказилган саралаш баҳсларида иштирок этди. Дмитрий Хорлин бу босқичда 56.80 сония натижа қайд этди ва ўз гуруҳида 5-ўринни эгаллади. Пара сузувчи учун бу натижа кейинги босқич йўлланмасини қўлга киритиш учун етарли бўлмади.

Аёллар ўртасида F41 классида диск улоқтириш бўйича финал баҳслари якунига етди. Ушбу дастурда қатнашган икки нафар ўзбекистонлик спортчи Кубаро Ҳакимова ҳамда Мадина Мухторова 9 ва 11 ўринни эгаллади.

Ўзбекистон терма жамоасининг маҳоратли пара ўқ отувчиси Сервер Ибрагимов кумуш медални қўлга киритди. Пара спортчи P4 классида 50 метрдан тўппончадан ўқ отиш дастурида 215.3 балл жамғариб, шоҳсупанинг иккинчи поғонасидан жой олди. Бу унинг фаолиятида Паралимпия ўйинларидаги иккинчи медаль бўлди.Ушбу дастурда иштирок этган Ўзбекистон терма жамоасининг бошқа бир аъзоси Шаҳноза Мамажонова 517 очко билан 21-ўринни эгаллади ва саралашдан ўта олмади.

Пара енгил атлетика бўйича аёллар ўртасида F46 классида ядро улоқтириш дастурида финал беллашувлари якунланди. Унда иштирок этган икки нафар спортчи  Розия Эргашева ҳамда Шахина Йигиталиева финалда 9 ва 12 ўринларни эгаллашди.

Пара велоспорт бўйича эркаклар ўртасида C5 классида шоссе йўналишида вақт пойгаси дастурида иштирок этган делегациянинг навбатдаги вакили Азимбек Абдуллаев 41 дақиқа 23.64 сония натижа кўрсатиб, 10-ўринни банд этди. Афсуски, спортчи ушбу натижаси орқали саралашдан ўта олмади.

Пара енгил атлетика бўйича эркаклар ўртасида Т11 классида 100 метрга югуриш баҳсларида қатнашган Урганч Эгамназаров 11.68 сония натижа билан ўз гуруҳида 2-ўринни эгаллади ва ярим финал босқичига йўлланма олди.

Шу тариқа Паралимпия ўйинларида ўзбекистонлик спортчиларнинг 4 сентябр кунидаги чиқишлари ўз якунига етди. Кун беллашувларида иштирок этган 10 нафар пара спортчининг фақат биттаси медаль билан кифояланди. Сервер Ибрагимовнинг кумуш медали Ўзбекистон терма жамоасининг медаллар сонини биттага кўпайтирди холос. Кеча медаллар рейтингида терма жамоа 10 ўринда турган бўлса, якунланган беллашувлардан сўнг икки поғона пастлаб, ҳозирда 12 ўринни эгаллаб турибди.