Ўзбекистон параспортчилари Осиёда иккинчи ўринни мустаҳкамлади

Ўзбекистон терма жамоаси V Пара Осиё ўйинларида 56 та медаль жамғарди. Спортчилар ҳисобида 17 та олтин, 21 та кумуш ва 18 та бронза медали бор. 20 октябрь кунги натижаларга кўра, Ўзбекистон вакиллари олти спорт турида 33 та медаль қўлга киритди: 11 та олтин, 11 та кумуш ва 11 та бронза.

Медаллар пара енгил атлетика, пара сузиш, пара пауэрлифтинг, пара велотрек, пара дзюдо ва пара таэквондо бўйича олинди.

Икки рекорд — икки олтин

Пара енгил атлетикада Мадина Мухторова ядро улоқтиришда (F40 класси бўйича) 9,10 метр натижа билан Осиё рекордини янгилади. Наврўза Ахматова (пара енгил атлетика F41 класси, ядро улоқтириш)  10,02 метр натижа билан Пара Осиё ўйинлари рекордини ўрнатди. Ҳар икки спортчи олтин медаль олди.

Пара пауэрлифтингда Ақидахон Ахтамова 55 килограммгача бўлган вазнда 128 килограмм тошни кўтариб, олтин медаль ва мусобақа рекордини қайд этди. Муслима Нуриддинова 61 килограммгача бўлган вазнда 129 килограмм натижа билан ғолиб бўлди. Насиба Тошпўлатова 123 килограмм натижа билан кумуш медаль олди.

Сузиш, велотрек ва яккакураш натижалари

Пара сузишда Дмитрий Хорлин, Мубинабону Халилова ва Азизбек Бойназаров олтин медалларни қўлга киритди.

Пара велотрекда Боймурод Явкочев 4000 метрга якка таъқиб пойгасида ғолиб бўлди, Азимбек Абдуллаев кумуш медаль олди.

Пара дзюдода Шоҳрух Мамедов, Муҳаммад Абдуқулов ва Кумушхон Ходжаева олтин медалларга сазовор бўлди. Турғун Абдиев кумуш, Отабек Ирисбеков бронза медалини қўлга киритди.

Пара таэквондода Қудратжон Ҳайдаров кумуш медаль олди. Зухриддин Тоҳиров, Камолахон Расулова ва Жавоҳир Алиқулов бронза медалларини жамғарди.

Медаллар рейтинги

20 октябрь ҳолатига кўра, кучли учлик

Хитой — 149 та медаль: 70 та олтин, 44 та кумуш, 35 та бронза.
Ўзбекистон — 56 та медаль: 17 та олтин, 21 та кумуш, 18 та бронза.
Япония — 63 та медаль: 16 та олтин, 20 та кумуш, 27 та бронза.

Ўзбекистон умумий медаллар сони бўйича Япониядан ортда, аммо олтин медаллар ҳисобида учинчи ўриндаги жамоадан олдинда бормоқда.

V Пара Осиё ўйинлари 24 октябрга қадар давом этади.

Эслатиб ўтамиз, аввалроқ Параосиё ўйинларида Ўзбекистон делегацияси медаллари сони 29 тага етгани ҳақида хабар берган эдик.

Муаллиф: Ҳасанбой ОЧУН