Президент йиғилишда икки туман ҳокимини ишдан олишга буюрди

 Бу ҳақда Президент Шавкат Мирзиёев раислигида бўлиб ўтган йиғилишда маълум қилинди.

Денов: катта маблағ, лекин натижа йўқ

Сурхондарёнинг Денов туманига Узун туманига нисбатан 4,5 баравар кўп маблағ ажратилганига қарамай, камбағалликни қисқартириш борасида сезиларли натижа кузатилмаган.

Камбағал оилалар реестрига кирган 1200 та оиланинг даромади бир йилдан бери ўзгармаган. Шу сабабли Денов тумани ҳокими Илҳом Аброров ва унинг биринчи ўринбосари Ш.Тўрақулов лавозимидан озод қилинди.

Чироқчи: аҳолини мажбуран кредитга жалб қилиш танқид қилинди

Қашқадарёдаги Чироқчи туманига жорий йил тадбиркорликни ривожлантириш учун 309 млрд сўм кредит ресурси ажратилган. Бироқ ҳокимлик аҳолига имкониятига яраша тайёр лойиҳалар таклиф қилиш ўрнига, одамларни ёппасига кредит олишга мажбурлаётгани Президент томонидан кескин танқид қилинди.

«Шунча ресурс билан одaмларга тайёр лойиҳа бериш ўрнига аҳoлини кредит олишга мажбурлаяпти. Унинг қайтимини ўйлагани ҳам йўқ», - деди Мирзиёев.

Шу боис Чироқчи тумани ҳокими Файзулла Юсупов ва биринчи ўринбосари Зафар Эргашев ишдан олинди.

Яна 20 та туман ҳокими бўйича чора кўрилади

Йиғилишда айрим туманларда бандлик масалаларида «жиддий камчиликлар ва кўзбўямачилик» аниқлангани таъкидланди.

Бош вазирга қуйидаги 20 туман ҳокимига нисбатан белгиланган тартибда чора кўриш топширилди:
Яшнобод, Бухоро, Ғиждувон, Косон, Хатирчи, Қумқўрғон, Янгиёл, Ўзбекистон, Гулистон, Яккабоғ, Андижон, Паркент, Тошкент, Нуробод, Учтепа, Чортоқ, Давлатобод, Олтинкўл, Қизириқ, Когон.

Маълумот учун:

• Илҳом Аброров — 2023 йил январидан бери Денов туманига раҳбарлик қилган.
• Файзулла Юсупов — 2023 йил августида Чироқчи тумани ҳокими этиб тайинланган.