Путиннинг маслаҳатчиси АҚШ – Россия муносабатлари қайта тикланишини маълум қилди

Қайд этилишича, АҚШ санкцияси остидаги сиёсатчи Кирилл Дмитриев учрашувда санкцияларни бекор қилишни расман сўралмаган бўлса-да, АҚШ – Россия бизнеси учун уларни юмшатиш фойдали бўлишини айтиб ўтган. 

У Россия – АҚШ муносабатларини тиклаш муҳимлиги ҳақида гапириб, яқинда икки мамлакат ўртасида яна музокаралар бошланишини маълум қилган. Аммо учрашувнинг санаси ва жойи ҳақида тўхталмаган. 

Дмитриев CNN'га берган интервьюсида Украина билан урушни тўхтатиш борасида АҚШ билан энергия иншоотларига ҳужум қилмаслик ҳақида муайян келишувга эришилганини айтиб ўтди. Бироқ шунга қарамай, Россия Украинага қарши ракета ҳужумларини давом эттирмоқда. 

Унга кўра, Қора денгизда ўт очишни тўхтатиш бўйича келишув учун Россия бир қанча шартлар, жумладан, санкцияларни бекор қилишни сўраган. 

Дональд Трамп эса Дмитриевнинг ташрифини эътироф этиб, яна бир бор Украина урушини имкон қадар тезроқ тугатишга чақирган. У Европани бу борада самарасиз деб, ўзи бу муаммони ҳал қила олишига ишонишини билдирди.