"Қўли қичиган" ўқитувчи энди директор ўринбосарини калтаклади

Унда ёзилишича, жорий йилнинг 24 сентябрь куни 1980 йилда туғилган Р.О. қизи Ж.Р. (2010 йилда туғилган) таҳсил оладиган Яшнобод туманидаги 204-умумий ўрта таълим мактабига бориб, мактаб раҳбарияти билан тортишиб қолган. Шундан сўнг мактаб директорининг ММИБ (маънавий-маърифий ишлар бўйича) ўринбосари Ғ.М.га нисбатан жисмоний куч ишлатган.

"Аёлдан жамоат жойида тартибига риоя қилиши сўралганида, мактаб ҳудудида Миллий гвардия ва ИИО ходимларига нисбатан ғайриижтимоий муносабатда бўлиб, уларнинг қонуний талабларини бажармасдан кескин қаршилик кўрсатган. Ушбу ноқонуний ҳаракатларини Р.О. кўплаб мактаб ўқувчилари кўз ўнгида содир этган", дейилади омбудсман хабарида.

25 сентябрь куни жиноят ишлари бўйича Яшнобод туман судида мазкур иш кўриб чиқилган. Р.О. суд томонидан Маъмурий жавобгарлик тўғрисидаги кодекснинг 183-моддаси (майда безорилик), 194-моддасининг 1-қисми (Ички ишлар органлари ходимининг қонуний талабларини бажармаслик) ва 197 (5) моддаси (таълим ташкилоти педагог ходимининг касбий фаолиятига қонунга хилоф равишда аралашиш ёки ўз хизмат вазифаларини бажаришига тўсқинлик қилиш) билан айбдор деб топилган. 

Унга нисбатан БҲМнинг 3 баравари (1 020 000 сўм) ҳамда 7 баравари (2 380 000 сўм) жарима тайинланган. Шунингдек, узил-кесил жазо сифатида 7 сутка маъмурий қамоқ чораси қўлланилган. Бу фақатгина директор ўринбосарига нисбатан қилган хатти-ҳаракатлари учун жазо эди. 

Ҳозирда Р.О.нинг Чилонзор туманидаги 188-сонли умумтаълим мактабда 6-синф ўқувчисига нисбатан содир этган ҳаракати юзасидан терговга қадар текширув ҳаракатлари олиб борилмоқда. 

Болалар омбудсманига кўра, педагог ва тарбиячилар тегишли вазифа ёки лавозимга тайинланишидан аввал махсус психологик кўрикдан ўтказилиши керак. Номуносиб хулқли, бола соғлиғи учун хавфли шахслар таълим-тарбия муассасаларида фаолият юритишига йўл қўйиш мумкин эмас. 

Эслатиб ўтамиз, бундан олдин Россия Ташқи ишлар вазирлиги матбуот котиби Мария Захарова Ўзбекистоннинг ички ишига аралашиб, Чилонзор тумани 188-мактабда юз берган ҳолат бўйича Ўзбекистон ҳукуматидан бу вазиятга изоҳ беришини сўраган эди.