Францияда намойиш: ўқувчилар мактабларга ўт қўйди

Францияда ўқувчиларнинг намойишлари мамлакатнинг бир қатор шаҳарларида тартибсизликларга айланди. Парижда мактаб директорларидан бирига бензин сепилган, Марсель ва Нант шаҳарларида эса таълим муассасаларида ёнғинлар содир бўлган.

BBC маълум қилишича, Парижда ҳужум қилган шахслар мактаб директорларидан бирини бензин билан ҳўллаб, камида иккита таълим муассасасида ёнғин чиқарган.

Марселда юзлаб ёшлар ёнғинни ўчириш учун келган ўт ўчириш машинасига ўт қўйган. Шаҳардаги бошқа лицей директори ҳам ҳужумга учраб, жароҳат олган. Нант шаҳрида эса намойишчилар мактабга ўт қўйган ва бинодаги фойе тўлиқ ёниб кетган.

Лилль шаҳрида ўқувчилар чиқинди контейнерларидан баррикадалар қуриб, уларни ёққан. Страсбургда ҳам мактаблардан бири яқинида чиқинди контейнерларига ўт қўйилган. Дижонда полиция намойишчиларни тарқатиш учун кўздан ёш оқизувчи газ ишлатган.

Намойишлар ўқитувчилар етишмаслиги, синфларда ўқувчилар сонининг кўплиги, мактабларнинг ҳолати ва ўқувчиларнинг катта юкламасига қарши бошланган. Сўнгги кунларда уларга олий таълим муассасалари талабалари ҳам қўшилган.

Франция ички ишлар вазирлиги маълумотига кўра, намойишлар давомида 440 киши ҳибсга олинган, уларнинг аксарияти вояга етмаганлар. 48 нафар ҳуқуқни муҳофаза қилувчи орган ходими жароҳатланган.

Таълим вазирлигига кўра, намойишлар ёки улар билан боғлиқ узилишлар мамлакат бўйлаб 400 дан ортиқ мактаб фаолиятига таъсир кўрсатган.

Франция ҳукумати намойишлар бўйича йиғилиш ўтказиб, айрим ҳудудлардаги вазиятни шаҳар тартибсизликлари ва зўравонлик билан кечаётган воқеалар сифатида баҳолаган. Айрим мактабларни масофавий таълимга ўтказиш режалаштирилмоқда.

Адлия вазирлигига эса воқеалар учун масъул шахсларни аниқлаш ва уларга нисбатан жиноий таъқиб чораларини кўриш топширилган. Намойиш иштирокчилари эса полиция томонидан куч ишлатилганини иддао қилмоқда.